ललितपुर, श्रावण १, नेपाल थियोलोजिकल कलेजमा “पूर्ण जीवन अध्ययन बाइबल” को अर्पण कार्यक्रम बृहत रुपमा सम्पन्न भएको छ। विमोचन कार्यक्रमको सुरूको प्रार्थना रेभ क्लिन्ट हवेलले गर्नुभएको थियो भने नेपालका विशिष्ट पास्टर रोवर्ट कार्थकले दिप प्रज्वलन गर्नु भएको थियो। नेपाली भाषामा पहिलो अध्ययन बाइबल ३१०० पेजको “पूर्ण जीवन अध्ययन बाइबल” करीब ३ वर्षको अवधिमा अनुवाद, सम्पादन र प्रकाशन गर्न सफल भएको कुरा पाहुनाहरूलाई स्वागत गर्ने क्रममा कार्यक्रम संयोजक तथा नेपाल थियोलोजिकल कलेजका प्रिन्सीपल डा बालकृष्ण शर्माले बताउनुभएको थियो। धेरै लामो समयको परिश्रमपछि लाइफ पब्लिसर्स इन्टरनेशनल र नेपाल बाइबल सोसाइटीको सहयोगमा अध्ययन बाइबल प्रकाशन गर्न सफल भएको कुरा डा शर्माले बताउनुभएको थियो। नेपालका मण्डलीहरूलाई बलियो बनाउनेमा विस्वस्त भएको कुरा बताउँदै रेभ जिम डिएरमानले अध्ययन बाइबल र लेखकको बारेमा विस्तृत रूपमा बताउनुभएको थियो।
विमोचन कार्यक्रममा रेभरेन्ड पास्टरहरू जोसेफ श्रेष्ठ, रोवर्ट कार्थक, दिलीप क्षेत्री, डा सिमोन पाण्डे, जेसन लोपर, टोमी मोर, डग ज्याकोब्सद्वारा संयूक्तरूपमा “पूर्ण जीवन अध्ययन बाइबल” को विमोचन गरिएको थियो। अध्ययन बाइबल अर्पणको प्रार्थना एसेम्बली अफ गड नेपालका अध्यक्ष रेभ जोसेफ श्रेष्ठ र रेभ टोमी मोरले गर्नुभएको थियो। सोही अवसरमा अध्ययन बाइबल परियोजनाका संयोजक डा बालकृष्ण शर्मा र उहाँको समूहलाई धन्यवाद टक्रयाउदै एउटा एउटा अध्ययन बाइबल हस्तान्तरण गर्नुभएको थियो।
नेपाली इसाई मण्डलीका पास्टर रोवर्ट कार्थकले विमोचन कार्यक्रमको अवसरमा परमेश्वरको वचन बाइबलबाट वचन बुझ्ने र वचन अनुसार जिउने कुरामा उत्साह दिनुभएको थियो । परमेश्वरको वचन ज्ञान आर्जन गर्नेमात्र नभएर पालना गर्नलाई हो भन्दै यहोशू १ र २ तिमोथी ३:१४-१७ बाट प्रष्ट्याउनुभएको थियो। उक्त बाइबलका अध्याय र पदहरू डा महेन्द्र भट्टराई र रेभ नविन सुनुवारले पाठ गर्नुभएको थियो।
सोही अवसरमा नेपालमा बाइबलको इतिहासको सन्दर्भमा नेपाल बाइबल सोसाइटीका महासचिव तेज जिरेलले बताउनुभएको थियो। नेपाली भाषामा पहिलो नयाँ करार बाइबल सन १९२१ मा प्रकाशित भएको पाइन्छ। William Carey ले नेपालीमा अनुवाद गरेका थिए। पादरी गंगाप्रसाद प्रधानले १९१४ मा नेपाली भाषामा बाइबल अनुवाद गरेका थिए। सन १९९७ देखि नेपाल बाइबल सोसाईटीले बाइबल छाप्ने काम गरेको कुरा महासचिव जिरेलले जानकारी गराउनुभएको थियो। पूर्ण जीवन अध्ययन बाइबलले नेपालका मण्डलीहरुलाई बलियो बनाउने कुरामा आशावादी भएको पनि व्यक्त गर्नुभएको थियो। अन्तमा आशिर्वादको प्रार्थना रेभ मार्क इंगलिसले गर्नुभएको थियो।
Discussion about this post