सतावटको संघारमा नेपाली इसाई समुदाय

बिगत केहि बर्षयता नेपालमा धर्मको नाममा राजनीति गर्नेहरु बढे संगै यहाँका क्रिश्चियनहरुलाई कुनै न कुनै हिसावले प्रहार गर्ने कामहरु भैराखेका छन् । कहिले मिडिया त कहिले स्थानिय समुदायलाई उचालेर क्रिश्चियनहरुलाई सताउने काम भएको छ । गएको बर्षमा केहि मण्डलीहरु जलाइएका छन्, सेवकहरुलाई कुटपिट गरिएको छ । ति दिनहरुमा जति पनि सतावटका घटनाहरु थिए, तिनीहरु संगठित सतावटहरु थिएनन् । तर पछिल्लो समयमा भने नेपाली क्रिश्चियनहरुमाथि संगठित सतावटकै छनक देखिन थालेको छ । केहि व्यक्तिहरूले विभिन्न संघ संगठन खोलेर क्रिश्चियनहरुको हरतरहले बिरोध गर्ने काम गरिराखेका छन् । उनीहरुले फेसबुक, युट्युब, स्थानिय रेडियो, टेलिभिजनहरुको प्रयोगद्वारा थुप्रै क्रिश्चियनबिरोधी भ्रामक कुराहरु छरेका छन् । उनीहरुका मुख्य अगुवाहरुले स्थानियस्तरमै क्रिश्चियनहरुको प्रतिरोध गर्न खुल्ला आह्वान गरिएका फेसबुक स्ट्याटसहरु लेखेका छन् ।

यो क्रम चलिराख्दा गत शुक्रवार (जुन १३) का दिन काठमाडौंको एउटा चर्चले आयोजना गरेको २४ जनाको बप्तिस्मा कार्यक्रमलाई  आफूलाई हिन्दु भन्ने केही व्यक्तिहरूको एउटा समुहले बिथोल्ने प्रयास गरेको थियो । उनीहरुले पास्टर महेश थान्जुलगायतलाई हातपात गर्ने प्रयास गरेको थियो । तर त्यहाँ उपस्थित प्रहरीले उनीहरुलाई हातपात गर्न बाट छेकेको थियो । त्यसपछि प्रहरीले बप्तिस्मा लिंदै गरेको २४ जना, पास्टर तथा अगुवाहरु गरि ४० जनालाई पक्राउ गरेको थियो । प्रहरी कार्यलयमा पुगेका हिन्दुहरुको समुहले जबर्जस्ति रुपमा धर्मपरिवर्तन गराएर बप्तिस्मा दिन लागिएको भन्दै मुद्दा दर्ता गराएको थियो । त्यसपछि प्रहरीले जबर्जस्ति बप्तिस्मा दिन लागिएको हो या होइन भन्ने बारेमा अनुसन्धान गरेको थियो । पास्टर, अगुवा गरि ८ जना बाहेकलाई त्यहि दिन राती छाडेको थियो । प्रहरीले बप्तिस्मा लिएका सबै २४ जनाको व्यक्तिगत बयान लिएको थियो । त्यस बयानको क्रममा सबैले आफुहरुले जबर्जस्ति नभई आफ्नै इच्छाले बप्तिस्मा लिएको बताएका थिए । साथमा बप्तिस्मा अघि भरिएको फर्मको फोटोकपी पनि बुझाइएको थियो, जसमा कसैको करबलले नभई आफ्नै इच्छामा बप्तिस्मा लिंदैछु भनेर लेखिएको थियो ।

शुक्रबार र शनिवार गरि लिइएको बयान पछि पनि नियन्त्रणमा रहनुभएकाहरुलाई छाडेको थिएन । तर कुनै गल्ति फेला नपरेपछि आइतबार दिउँसो फरक फरक समयमा गरि नियन्त्रणमा रहेका सबै अर्थात् ८ जनालाई नै छाड्यो । बप्तिस्मा कार्यक्रम बिथोल्नेहरुकै समुहले सुन्दरीजल मण्डलीमा गत शनिवार (जुन 14) को आराधना सेवा बिथोल्ने प्रयास गरेको छ । ठुलो संख्यामा आएका उनीहरुले क्रिश्चियनहरुको अस्तित्व मेटाइदिने भन्दै नाराबाजी गरेका थिए । मण्डलीका ढोकाहरु र बोर्डमा पनि तोडफोड गरेका थिए । उनीहरुले मण्डलीका आमा दिदिबहिनिहरुलाई अपशब्द बोलेका थिए भने अब उप्रान्त यस मण्डलीमा संगति नगर्न चेतावनी दिएका थिए । त्यसका साथै आफुहरुले यहि चर्चबाट सुरु गरेर देशभरिका सबै चर्च बन्द गराइदिने भन्दै धम्क्याएका थिए । केहि बेर पछि आइपुगेको प्रहरीले  उनीहरुलाई पछाडी हटाएको थियो । उनीहरुले मण्डलीमा तालाबन्दी गर्न भ्याएका थिएनन् तर सबै क्रिश्चियनहरुमा त्रास सिर्जना गराउनको निम्ति हुनसक्छ त्यस मण्डलीमा आफुहरुले तालाबन्दी गरेको भनेर फेसबुकमार्फत प्रचारबाजी समेत गरेका थिए ।

दक्षिणी छिमेकी भारतमा हिन्दुवादी नेता नरेन्द्र मोदी प्रधानमन्त्री भएलगत्तै क्रिश्चियनहरुलाई सताउन चाहनेको मनोबल ह्वात्तै बढेको देखिन्छ । हामी सबैले मिलेर प्रार्थना गरौँ परमेश्वरले यस देशमाथि आफ्नो निगाह राख्नुभएको होस्, प्रभुका जनहरुलाई सताउन चाहनेहरुको हृदयमा उहाँ बोल्नुभएको होस् र यो देशमा सनातनदेखिको उहाँको इच्छा पुरा हुन सकोस् ।