मृत्युशैय्यामा पुगेकाहरु चुनाव लड्दैछन् : प्रश्रित/ एउटा दलले इसाइहरुबाट ३/३ करोड खाएको आरोप

४ असोज काठमाडौं । पूर्वमन्त्री एवं एमाले नेता मोदनाथ प्रश्रितले मृत्युशैय्यामा पुगेका नेताले पनि संविधानसभा चुनावमा भाग लिन खोजेको भन्दै यसलाई नेताहरुको लबस्तरो प्रवृत्ति बताउनुभएको छ । साहित्यकार समेत रहनुभएका प्रश्रितले उमेर ढल्किएकालेहरुले चुनाव नलडी युवाहरुको ‘मैले चुनावमा उठ्दिँन भनेर धेरै पहिल्यै घोषणा गरिसकेको हो । ६० वर्षदेखि नै राजनीतिबाट अवकाश लिनुपर्छ भन्ने मेरो धारणा थियो, अहिले ७२ वर्ष पुगें ।’ अनलाइनखबरसँग कुरा गर्दै उहाँले भन्नुभयो, ‘मृत्युशैयामा पुगेकाहरु पनि चुनाव लड्न खोज्दैछन्, यो गलत हो, हामीले परिपक्व युवापुस्ताको हातमा नेतृत्व सुम्पेर अभिभावकको भूमिका खेल्नुपर्छ ।अभिभावकत्व गर्नुपर्ने बताउनुभएको छ ।

पञ्चायतकाल र ०४६ को परिवर्तनपछि वामपन्थी वृत्तमा असाध्यै चर्चित रहनुभएका प्रश्रितका पुस्तक र साहित्य पढेर कम्युनिष्ट बन्नेहरु नेपालमा धेरै छन् । तर, विगत केही वर्षदेखि उहाँले नेकपा एमालेको केन्द्रीय नेतृत्वबाट स्वेच्छिक अवकाश लिइसक्नुभएको छ । ‘मलाई प्रज्ञा प्रतिष्ठानको कुलपति बन्ने प्रस्ताव पनि आएको थियो, तर १०-५ को ड्युटी गर्ने कुनै पनि नियुक्तिमा जान्न र लेखन कार्यमा लाग्छु भनेर मैले अस्वीकार गरें ।’ पूर्वशिक्षामन्त्री प्रश्रितले भन्नुभयो, एमालेले कहिलेकाँहि सैद्धान्तिक एवं वौद्धिक प्रशिक्षणहरुमा बोलायो भने जाने गरेको छु । तर, चुनावचाँहि लड्दिँन भनेर पहिल्यै भनिसकेको छु ।’

संविधानसभा चुनावका लागि एमालेले १०/१० जना उमेद्वारको नाम सिफारिस गर्न लगाएर गल्ती गरेको उहाँले बताउनुभयो । ‘एक-दुई जनाको नाम सिफारिस गर्न लगाएको भए हुन्थ्यो, १०/१० जनालाई आश देखाएपछि यो घातक तरिका भयो ।’ उहाँले भन्नुभयो, ६० वर्ष कटेकाले युवालाई ठाउँ छाडिदिनुपर्छ ।’

नेताको दिमागमा राष्ट्रको नक्शा भएन

साहित्यकार एवं वौद्धिक व्यक्तित्वका रुपमा छवि बनाउनुभएका प्रश्रितले आगामी संविधानसभामा नेताहरुले दह्रो अडान लिनुपर्ने सुझाव दिनुभएको छ । एमाओवादीले जे जे भन्छ, त्यसैलाई हुन्छ हुन्छ भन्दै नेताहरु हिँड्न नहुने उहाँको भनाइ छ । ‘राष्ट्रको इतिहास नबुझेका र राष्ट्र कसरी बन्यो भन्ने नबुझेका नेताहरुले गर्दा देश संकटमा परेको हो,’उहाँले भन्नुभयो-’नेताहरुको दिमागमा राष्ट्रको तस्वीर रहेन छ, त्यसैले जथाभावी नक्शा कोर्दै हिँडेका छन् ।’

आफूले मुलुकका सामु दुईवटा खतरा देखेको उहाँले बताउनुभयो । ‘एक मधेस एक प्रदेश सबैभन्दा ठूलो खतरा हो । दोस्रो, इसाइ संस्कृतिले नेपाललाई ध्वस्त गर्ने खतरा छ ।’ प्रश्रितले भन्नुभयो, ‘नेपालमा चीन र अमेरिकाको प्रभाव देखेर युरोपका इसाइहरु छट्पटिएका छन् । उनीहरु क्रिश्चिय धर्मको प्रचारमार्फत् नेपालको मौलिक संस्कृति ध्वस्त पार्न लागिपरेका छन् । अर्कोतिर एक मधेस एक प्रदेश चाहियो भन्दाखेरि हाम्रा नेताहरुले लत्रिएर हुन्छ हुन्छ भन्ने गरेका छन् ।’

एमाओवादी, कांग्रेस र एमाले लगायतका सबै दलहरुमा इसाइले किनेका नेताहरु रहेको उहाँले दाबी गर्नुभयो । ‘हाम्रा नेताहरुमा लबस्तरो चिन्तन भयो, विदेशकेन्द्रित नेताहरु भए । दलमा इसाइले किनेका नेताहरु छन् ।’ प्रश्रतिले अगाडि भन्नुभयो,-’एउटा दलले इसाइहरुबाट ३/३ करोड खाएको चर्चा छ ।’

माओवादीले जुनजुन जातिलाई राज्य दिन्छु भन्दा पनि हाम्रा नेताले प्रतिवाद गरेनन् । राष्ट्र कसरी बनेको हो, यो के गर्दा टिक्छ र के गर्दा ध्वस्त हुन्छ भन्ने हाम्रा नेताहरुलाई थाहै रहेन छ ।

जातीय आधारमा राज्य विभाजन गर्न नहुने र पृथ्वीनारायण शाहलाई सम्मान गर्नुपर्ने बताउँदै आउनुभएका प्रश्रतिले यसैसाता ‘नेपाल गणयुगदेखि राष्ट्रयुगसम्म’ नामक पछिल्लो किताव लेख्नुभएको छ ।

– See more at: http://www.onlinekhabar.com/2013/09/117477/#sthash.SFkp01Yl.dpuf