आजको समाजमा इसाई दायित्व

कविता

थिचिएका छन् मान्छेहरू
अन्धकारका विशाल पहाडले
कुनै गहिरो खोंचमा
भौतरिएर बाँच्न विवश
आशारहित भीडहरु
बरालिएका छन् यत्रतत्र
सपनाका अधुरा यात्राहरु
लागीरहेछन् अनायास पूर्णविराम
समाजका यी दुःखदायी
यथार्थ कहानीको उकाली-ओरालीमा
ख्रीष्टको ज्योति चम्काउने
हामी इसाईको दायित्व हो
सबलाई स्वतन्त्र पार्ने
ख्रीष्ट येशूको सत्य हो

समयको गढतीरमा
टक्क अडिएर
कतै जीवनको जीजविषा
छचल्कीरहेछन् मान्छेको मन मनमा
धमिलो पानी जस्तै
बग्दै जाने धमिलो मन
शुद्धताको खातिर
अनगिन्ती निर्रथक प्रयासहरु
असफलताको खात बनेर
थुप्रीरहेछन् हिमालचुली जस्तै
यस अर्थमा
हामी आम इसाईहरु
डाँडामा बसालिएको शहर जस्तो
नमूना बन्नुछ
र देखाउनुछ बाटो सत्यको
बाँड्नुछ मुक्ति येशूको
अग्लो पहाड जस्तै
उभिनुछ ठिङ्ग
ख्रीष्टको असल साक्षी बनेर
सुनाउनुछ मुक्तिको सन्देश

अशान्तिको छालहरु
आउँछन् र ठोकिन्छन्
मान्छे वितृष्णाको मैदान चहार्दै
अँध्यारा मुहार गुजमुज्ज पार्छन्
इच्छा र अकाँक्षाका
अनगिन्ती भर्याङ्ग
उक्लन्छन् र झर्छन्
वेस्वादिलो र टररो जीबन लिएर
नमिठो अनुभूति बाँचीरहन्छन्
बिडम्वानाका यस्ता श्रृखंलाहरु
स्वार्थका कैयन पोकाहरु बोकेर
मनवताको खिल्ली उर्डाईदै गर्दा
मान्छे आफै
आशारहित र असन्तुष्टिको
छाँयामा रुमल्लिदै
हराएका छन् सत्यको खोजमा
यद्यपि हामी इसाईहरुसँग
ख्रीष्टिय आशाको सन्देश छ
सक्छौं हामी बाँड्न
ख्रीष्टको शान्ति र आशा
सक्छौं हामी दिन
ख्रीष्टको मुक्ति र उद्धार
परिवर्तनको मधुर ध्वनी
सक्छौं हामी गुन्जाउन
दायित्वको यी अपार चौबाटोमा
बाँड्नुछ क्रुसको प्रेम
धाँदोमा उभिएर
अर्न्तविन्ती चढाउने
ख्रीष्टमा विश्वासका
बन्नुछ वलिया मान्छेहरु
हर मान्छेको मनको कुना कुनामा
धार्मिकताका राज्य
स्थापित गर्नुछ
निराशा मान्छेहरुको मुहारमा
ल्याउनु छ ख्रीष्टको आनन्द र खुशीयाली
फैलाउनुछ सुवास्ना उद्धार र मुक्तिको
उजिल्याउनुछ निराश मुहारहरु
ख्रीष्टविना बाँचेका ती आत्माहरुलाई
सुनाउनुछ सत्यको खबर
उप्काएर भ्रमको पर्दाहरु
निकाल्नुछ शैतानको जालोबाट
ती मुक्तिका भोका
अनि तृषित मान्छेहरुलाई
सुनाउनुछ मुक्तिदाता येशूको कुरा
जोड्नुछ येशूमा
फुटेका ती सपनाका
अनगिन्ती चोइटाहरु
मान्छेको मन दुःखीरहेको बेला
फुक्नुछ ख्रीष्टिय शान्ति र मुक्तिको बिगुल
सिउँनुछ येशूको त्यो महान प्रेमले
ती उध्रिएका मनका सिउँनीहरु
विगतका ती धुमिल छाँया मेटाएर
ख्रीष्टको न्यानो स्पर्शमा
ज्योति छर्नु अँधेरीमा
र आजको समाजमा
ख्रीष्टको महान आज्ञा पालन गर्दै
पुरा गर्नुछ आफ्नो कर्तव्य
निभाउनुछ आफ्नो महान दायित्व

रेशम कुमार सुनुवार
पो. ब. नं. १३९०२, काठमाडौं ।