नेकोनको प्रदेश नम्बर तीन तथा केन्द्रिय समितिको संयुक्त बैठक सम्पन्न

नेकोनको प्रदेश नम्बर तीन तथा केन्द्रिय समितिको संयुक्त बैठक सम्पन्न

मङ्सिर १३, बिहीवार (November 29, 2018, Thursday)

ललितपुर

ललितपुरको महालक्ष्मीस्थान स्थित माइका नेटवर्क नेपालको कार्यालय हलमा नेपाल इसाई गैरसरकारी संस्था संगठन (नेकोन) को प्रदेश नम्बर तीन तथा केन्द्रिय समितिको संयुक्त  बैठक सम्पन्न भएको छ ।

अाइएनएनएनका कार्यक्रम अधिकृत ज्ञान नारायण श्रेष्ठले नवगठित प्रदेश तीनको कमिटि सदस्यहरूलाई स्वागत गरी उपस्थित व्यक्तिहरूलाई अाफ्नो परिचय दिन समय उपलब्ध गराउनुभएपछि, नेकोनका राष्ट्रिय संयोजक डा. कृष्णमान शाक्यले नेकोनको बारेमा तथा प्रदेश तीन समितिले कसरी कार्य गर्नुपर्ला भन्ने बारे सहभागीहरूलाई अा-अाफ्नो धारणा प्रस्तुत गर्न समय दिनुभयो

त्यस क्रममा उठेका केही महत्वपूर्ण विषयहरूमाः कसरी क्षमता अभिवृद्धि गर्ने, सरोकारवाला तथा सरकारी निकायहरूसँगको पहुँमा कसरी प्रभावकारी बन्ने, गैरसरकारी संघसंस्था तथा नेकोनकै उपादेयता के कस्तो रहने, त्यसबारेमा बहस र पैरवी गर्ने, अाफ्ना दक्षता र सिप अदानप्रदान गर्ने बारेमा छलफल भएको थियो । साथै नेकोनमा सदस्यताको परिधि के कस्तो हुने बारेमा गैरसरकारी संस्था, नाफा वितरण नगर्ने कम्पनी, तथा गुठी (ट्रस्ट) अादि तीनैवटालाई समावेस गर्नुपर्ने बारेमा सर्वसम्मतिले निर्णय गरियो ।

फेथ बेस्ड अर्गनाइजेसन भन्नाले, हाम्रो सन्दर्भमाचाहिँ, इसाई, बाइबलीय विश्वास अनि मूल्यमान्यतामा अधारित संघसंस्थाहरू बुझ्नुपर्छ भन्ने सहमति पनि कायम गरियो ।

सामाजिक र भाैतिक परिवर्तन र विकास सुधार मात्र नभएर, रूपान्तरण नै चाहन्छाैँ भन्ने कुरामा सबैको एक मत रह्यो ।

अबका दिनमा नेकोनको बारेमा जानकारी दिँदै जाने, कार्यविधि तय गर्दै अगि बढ्ने, तथा यो लचिलो सञ्जालमा सदस्यताका लागि बाँकी संघसंस्थाहरूलाई प्रोत्साहन दिँदै जाने पनि निर्णय गरियो ।

यस सञ्जालका सामु सामाजिक सेवा र विकासमा कार्य गर्ने अास्थामा अाधारित संघसंस्थाहरूलाई अाफ्नो कार्य गर्न सहजता र कतिपय सहायता उपलब्ध गराउने प्रचुर सम्भावना छ । तथापि अर्कोतर्फबाट हेर्दा, यसलाई राजनीति गर्ने अर्को मञ्च बनाउन, तथा सञ्जालको अवधारणबाट डिरेल भएर अाफैँ बजेट ल्याउने र काम गर्ने अर्को एनजिअो त बन्ने होइन भन्ने प्रश्न र शंका पनि उत्तिकै छ । यसकारण, सुझबुझ  र एक लचिलो सञ्जालकै रूपमा रहेर अगिबढे नेकोनको उपादेयता कायम रहने र शंकाउपशंका र अालोचनाका स्वरहरू विस्तारै सम्बोधन भई सकारात्मक धारणा निर्माण हुने कुरामा अाशावादी बन्न सकिन्छ ।

– विदुर अधिकारी