रेभ. के.पी. देवकोटाको पार्थिव शरीरको अन्तिम विदाइ

मिति २०७२ जेठ २२ गतेका दिन रेभ. केपी देवकोटाको पार्थिव शरीरको अन्तिम विदाई कार्यक्रम शालोम एजी चर्च कलंकीमा भएको छ। केपी देवकोटाको ५१ वर्षको उमेरमा जेठ २० गते बेलुका ७:१५ बजे हृदयघात भएर सहिद गंगालाल हृदयरोग केन्द्रमा मृत्यू भएको थियो। देवकोटाको पार्थिव शरीरको अन्त्यष्टी कार्यक्रममा IFES को तर्फबाट रबि डेविट आउनुभएको थियो। गुवाहटीबाट रेभ पास्टर दिलीप क्षेत्री आउनुभएको थियो। कार्यक्रममा नातेदारहरू र विभिन्न मण्डलीका पास्टर अगुवाहरूको उपस्थिती रहेको थियो। अन्त्यष्टी कार्यक्रममा लगभग ६०० जनाजतिको सहभागिता रहेको थियो। देवकोटाको पार्थिव शरीरलाई धापासीमा ख्रीष्टियन संस्कार अनुसार दफन गरिएको छ।

केपी देवकोटा श्वास फेर्न अलि गाह्रो र बेला बेलामा छाती दुखे पछि शहिद गंगालाल हृदयरोग केन्द्रमा बैशाख २० गते जानुभएको थियो। रिपोर्टमा कुनै पनि समस्या नदेखिएपछि अवजरभेसनको लागि अस्पतालमा भर्ना गर्न र आराम गर्न डाक्टरले सल्लाह दिएका थिए। सल्लाहअनुसार केपी देवकोटालाई भर्ना गरिएको थियो। भर्ना भएको बेला नै बेडबाट साथीहरूलाई फोनमा कुरा गर्नुभएको थियो। डिस्चार्ज भएपछि भेट्ने कुरा पनि गर्नुभएको कुरा सम्बन्धित व्यक्तिहरू बताउनु हुन्छ। केपी देवकोटाले मलाई ठीक छ तिमीहरू (श्रीमती माया देवकोटा र भतिजी राधा देवकोटालाई) खाजा खाएर आउ भनि खाजा खान वाहिर पठाउनुभएको थियो। श्रीमती र भतिजी खाजा खाएर फर्केर आउँदा बेडबाट भुइमा लडेको अवस्थामा देखेपछि तुरून्तै सम्बन्धित ठाउँमा नर्सहरूलाई जानकारी गराइएको थियो। नर्सहरू गएर पम्प गर्दा देवकोटा वितिसकेको कुरा एनबीसिबिएसका महासचिव राम कुमार लामाले जानकारी गराउनुभएको थियो।

केपी देवकोटाले विद्यार्थी जीवनमा ख्रीष्टलाई पाउनुभएको थियो। ख्रीष्टलाई विश्वास गरेपछि विद्यार्थी जीवनमा नै  NBCBS मा स्वयसेवकका रूपमा सेवा  गर्नुभयो। पार्ट टाइमा स्टाफ पनि हुनुभयो पुरा समय सेवा गर्दै गर्दा महासचिवको रूपमा सेवा गर्नुभएको थियो। लगभग २० वर्ष NBCBS मा सेवा गर्नुभएको थियो।  सन् २००९देखि IFES मा साउथ एशियाको लागि रेजनल सेक्रेटरीको रूपमा सेवारत हुनुहुन्थ्यो। सेवा गर्ने सिलसिलामा हैदराबादको भाइजक भन्ने ठाउमा परिवारसहित (छोरा आनन्द र श्रीमती माया देवकोटा) बस्दै आउनुभएको थियो। भिसासम्बन्धिको कामले केपी देवकोटा २०७२ बैशाख ९ गते श्रीमती मायासँग काठमाडौंमा आउनुभएको थियो। बैशाख १२ गते भुकम्प पछि भुकम्प पीडितहरूको लागि राहत वितरण र अस्थायी आवास निर्माणमा सक्रिय हुनुभएको थियो। साथीहरूलाई अगुवाजनहरूलाई भेटेर कुरा गर्नु छ भनेर जानकारी गराउनुभएको थियो। अकस्मात देवकोटाको मृत्यूले धेरैलाई स्तव्ध बनाएको छ।

केपी देवकोटाले पुरा समय ख्रीष्टको निम्ति नै बिताउनुभयो। साथै ख्रीष्टियान विभिन्न संस्थाहरू आशा केन्द्र, टिरानस, आइटीन, डिएआइमा प्रत्यक्षरूपमा अप्रत्यक्ष रूपमा सहायता पुर्‍याउनुभएको थियो। अन्त्यष्टी सेवामा विभिन्न व्यक्तिहरूले केपी देवकोटाको बारेमा भन्ने क्रममा लोकनाथ मनेन भन्नुहुन्छ,” भाइले ख्रीष्टलाई पाउनुभन्दा पहिला चर्चमा ढुङ्गा हान्ने काम गर्नुभएको थियो। ख्रीष्टियानहरूलाई घृणा गर्ने काम गर्नुहुन्थ्यो। ख्रीष्टियान भएपछि विद्यार्थी संगतिद्वारा ख्रीष्टको निम्ति धेरै ठूलो काम गर्नुभएको छ। जसरी पावलले पहिला ख्रीष्टियानलाई दुख दिए ख्रीष्टियान भएपछि बाइबलका धेरै पुस्तक लेखे”। केपी देवकोटाको बारेमा थुप्रै व्यक्तिको भनाइ अनुसार एउटा असल सेवक ख्रीष्टको सेवामा असल पार्ने कुनै पनि कुरामा सम्झौता नगर्ने भएको टिप्पणी गरेका थिए।