२० असोज २०८३, मंगलबार
कोलकाताको प्रसिद्ध साल्ट लेक स्टेडियम बाहिर सोमबार दिनभरि नै समर्थकहरूको भीडभाड र असन्तुष्टि देखियो। डिसेम्बर २०२५ मा लियोनेल मेस्सीको भारत भ्रमण (‘जी.ओ.ए.टी’ टुर) का क्रममा अव्यवस्था र निराशा व्यहोरेका झन्डै २२,००० प्रशंसकहरूलाई पश्चिम बंगाल सरकारले भारत र उरुग्वेबीच हुने मैत्रीपूर्ण फुटबल खेलको नि:शुल्क पास दिने घोषणा गरेको थियो। तर, घण्टौंसम्म लामो लाइनमा बसेर नि:शुल्क पास हात पारेका धेरै समर्थकहरू भने अझै निराश देखिएका छन्।
विगतमा महँगो टिकट किनेका समर्थकहरूलाई दिइएको सस्तो मूल्यका पास, कागजात नपुगेको बहानामा फर्काइएको अवस्था र काउन्टर समयमै बन्द नहुनु जस्ता समस्याले उनीहरूमाझ फेरि असन्तोष चुलिएको छ। हजारौँ रुपियाँ खर्चेर मेस्सीलाई हेर्न आएका समर्थकहरूलाई मात्र १९९ देखि ९९९ रुपियाँसम्मका पास उपलब्ध गराइएकाले उनीहरूले यसलाई केवल ‘आँखामा छारो हाल्ने काम’ मात्र भएको बताएका छन्। टाढा-टाढाबाट कामधन्दा छोडेर र यातायातको थप खर्च व्यहोरेर आएका समर्थकहरूले आफूले पहिले तिरेको महँगो रकमको शोधभर्ना वा बराबरको सुविधा नपाएको गुनासो गरेका छन्। अन्तर्राष्ट्रिय विन्डोको अन्तिम मैत्रीपूर्ण खेलको रूपमा हेरिएको यस प्रतिस्पर्धाअघि दर्शक बढाउन आयोजकले केही टिकटको मूल्यमा ९० प्रतिशतसम्म छुट दिए पनि, अघिल्लो घटनाको नमीठो अनुभव र अव्यवस्थित पास वितरण प्रणालीका कारण समर्थकहरू पूर्ण रूपमा सन्तुष्ट हुन सकेका छैनन्।
डिसेम्बर २०२५ मा लियोनेल मेस्सीको भारत भ्रमणका क्रममा कोलकाताको साल्ट लेक स्टेडियममा आयोजकको फितलो व्यवस्थापन र भीआईपीहरूको अत्यधिक भीडका कारण ठूलो अराजकता सिर्जना भएको थियो। रु ५,००० देखि १६,००० सम्मका महँगो टिकट किनेका प्रशंसकहरूलाई स्थानीय नेता तथा मन्त्रीहरूले मेस्सीलाई घेरेपछि खेल हेर्नबाट वञ्चित हुनु परेको थियो भने असजिलो महसुस गर्दै मेस्सी मैदान प्रवेश गरेको करिब १५-२० मिनेटभित्रै बाहिरिएका थिए। मेस्सी चाँडै प्रस्थान गरेपछि आक्रोशित समर्थकहरूले प्यारापिटका कुर्सीहरू भाँचिदिए, सुरक्षा बारहरू तोडे र मैदानभित्र बोतलहरू फालेर विरोध प्रदर्शन गरे, जसको परिणामस्वरूप व्यापक जनआक्रोशपछि मुख्य आयोजक सतद्रु दत्तालाई गिरफ्तार गरिएको थियो र पछि ठगिएका झन्डै २२,००० प्रशंसकहरूलाई क्षतिपूर्तिको रूपमा नि:शुल्क पास दिने घोषणा गरिएको थियो।
Discussion about this post