मुलुक धर्म निरपेक्ष हुन्छः सभासद ढकाल

सन्देश पौडेल/मसिर २२,
सबिधानसभा सदस्य लोकमणी ढकालले अव बन्ने सबिधानमा मुलुक धर्म निरपेक्ष हुने निश्चित भएको बताउनु भएको छ। सोमबार बेसीशहरमा लमजुङ इसाइ समाजका अगुवाहरु सँग अन्तरक्रिया गर्दै सभासद ढकालले यस्तो बताउनु भएको हो।
नेपाल जनजागरण पार्टीका तर्फबाट सभासद बन्नुभएका सभासद ढकालले निर्माणको क्रममा रहेको सबिधानमा मुलुक धर्म निरपेक्ष, सघिय र गणतन्त्र परिवर्तन नहुने गरि लेखिएको दावि गर्नुभयो। मुलुकका अधिकाँश दलहरु धर्मनिरपेक्षताको पक्षमा रहेकोले अव केहिब्यक्तीले बोल्दैमा निर्णयपरिवर्तन नहुने बताउनुभयो। उहाँले बैदेशिक निकायका बिभिन्न क्षेत्रमा समेत नेपाल धर्म निरपेक्ष राष्ट्र हुने बिषयमा र्सार्वजनिक गरिएकोले यस बिषयमा कुनै शँका नभएको जानकारी गराउनुभयो।
पछिल्लो समय धर्म निरपेक्षको बिरुद्धमा बिभिन्न आवाज उठेपनि ख्रिष्टियनहरुले प्रतिवाद गर्न नहुने बताउनुभयो। “ख्रिष्टियनहरु शान्तीको निम्ती प्रार्थना गर्ने हो’ सभासद ढकालले भन्नुभयो “सडकमा ओर्लिएर आन्दोलन गर्ने हाम्रो नैतिकता होइन’। पछिल्लो समय ख्रिष्टियनहरुलाई उत्तेजित पार्ने बिभिन्न गतिबिधि भएपनि यसको बिरुद्ध नलाग्न ख्रिष्टियन समुदायलाई आग्रह गर्नुभयो।
जनजागरण पार्टी केन्द्रिय अध्यक्ष समेत रहनुभएका सभासद ढकालले केहि बुँदामा सहमती हुन बाहेक सबिधान लेखनको प्रक्रिया सकिएकोले सबिधान जारी हुने बताउनुभयो। उहाँले माघ ८ मा सबिधान जारी गर्न कार्यतालिका प्रभावित भइसकेको बताउदै केहि ढिलागरि भएपनि सबिधान जारी हुनेमा बिश्वस्त हुन आग्रह गर्नुभयो।
कार्यक्रममा उपस्थित हुनुभएका सघिय समाजबादी पार्टिका केन्द्रिय सदस्य खेमजङ गुरुङले मुलुक सघियता, पहिचान र धर्मनिरपेक्षको लागि सँगै आन्दोलन गर्नुपर्ने धारण ब्यक्त गर्नुभयो। ठूला दल धर्मनिरपेक्षको बिपक्षमा रहेको भन्दै गुरुङले यसकोबिरुद्ध सडक आन्दोलनमा उत्रिन ख्रिष्टियन समूदायलाई आग्रह गर्नुभयो। उहाँले मुलुकमा सवैजाती, धर्म र समूदायको हक अधिकारको लागि आवाज उठाउन सहकार्य गर्नुपर्नेमा जोड दिनुभयो।
लमजुङ ख्रिष्टिय सामूदायिक एकताका अध्यक्ष ठाकुरु गुरुङको अध्यक्षतामा भएको सो कार्यक्रममा जनजागरण पार्टी केन्द्रिय महासचिव बिपि खनाल, कोषाध्यक्ष राजु पाण्डे, स्थायी समिति सदस्य गणेश केसी, केन्द्रिय सदस्य रामचन्द्र खाती, इसाइ समाज लमजुङका निबर्तमान अध्यक्ष रोशन राई, इसाई दिदि बहिनी समाजकी अध्यक्ष बिष्णुमाया गुरुङ, लमजुङ ख्रिष्टिय युथ सोसाइटीका अध्यक्ष सेतु गुरुङ लगायत मण्डलीका पाष्टर अगुवाहरुको उपस्थीती रहेको थियो। कार्यक्रममा सहभागीहरुले निर्माणाधिन सबिधान र प्रक्रियाका बारेमा बिबिध जिज्ञासा राखेका थिए।