आइटीन शिक्षक तालिम र पास्टर तथा शिक्षक विद्यार्थी भेटघाट कार्यक्रम

धरान एलोहिम चर्चमा तीन दिनको आइटीन शिक्षक तालिम सम्पन्‍न भएको छ। एलोहिम चर्चद्वारा आयोजना भएको शिक्षक तालिममा १२ जना पास्टर र अगुवाहरूको सहभागिता रहेको थियो। एलोहिम चर्च संख्यात्मक रूपमा बढ्दै गएपछि पास्टर मनि गुरूङले मण्डलीमा व्यवस्थित बाइबलको शिक्षाको आवश्यकता खोज्दै जाने क्रममा आइटीन आवश्यक ठान्नुभयो। आइटीन र एलोहिम मण्डलीको सहमति र लामो समयको प्रार्थनाद्वारा यो आइटीन शिक्षक तालिम २०७१ भदौ ३-५ गतेसम्म सम्पन्‍न भएको छ।

तीन दिनको शिक्षक तालिमको आयोजना एलोहिम चर्च धरानले नै गरेको थियो। अब आइटीनका पाठ्यक्रमहरू १३ वटा झुण्डमा शुरू गरी मण्डलीका विश्वासीहरूलाई अगुवापनमा ल्याउन र बाइबलको शिक्षामा मण्डली बलियो हुने कुरामा पास्टर अगुवाहरू विश्वस्त हुनुहुन्छ। अबको एक वर्षभित्रमा ३ वटा पाठ्यक्रम पुरा गर्ने योजना एलोहिम मण्डलीले बनाएको छ।
तालिमको अन्तिम दिन अर्थात ५ गते पाठ्यक्रमहरू अध्ययनरत पास्टर, अगुवा, शिक्षक तथा विद्यार्थीहरूको भेटघाट कार्यक्रम भएको थियो। उक्त भेलामा ब्रदरेन एस्म्बली, अनुग्रह चर्च, इम्मानुएल कृपा चर्च, चर्च अफ गड धरान, सियोन मेथोडिस्ट चर्च, बेथलेहम मण्डली र एलोहिम मण्डलीबाट गरी लगभग ५० जनाको उपस्थिति रहेको थियो।अध्ययनरतहरूले अध्ययनबाट पाएको आशिष्, बानी व्यहोरा परिवर्तन र पाएको चुनौतिहरू बाँड्नुभएको थियो। ख्रीष्टियानहरूको उत्तरदायित्व मण्डली र समाजको लागि भएको कुरामा निश्चित भइ सक्दो अभ्यास भइरहेको कुराले भेलामा एकले अर्कालाई उत्साहित बनाएको थियो। जुन जुन मण्डलीमा आइटीन पाठ्यक्रमहरू हुँदैछन् ति मण्डली समूह समूहमा बसी अागामी दिनहरूमा अध्ययनलाई निरन्तरता र व्यवहारिक पक्षमा सबल हुन योजना बनाएर सुनाउने काम पनि भएको थियो।
सोही अवसरमा तीन दिनको शिक्षक तालिमको प्रमाणपत्र पास्टर ध्रुवप्रसाद श्रेष्ठको हातबाट वितरण भएको थियो। तीन दिनको शिक्षक तालिमको लागि र शिक्षक तथा विद्यार्थी भेटघाट कार्यक्रमबाट पुन: ताजगि बनाउनमा सर्जु रिजाल सहजीकरण गर्नुभएको थियो।  साथै सियोन मेथोडिस्ट चर्चका पास्टर खड्ग थापाले डिभोसनमा वचनबाट उत्साहित पार्नुभएको थियो। ब्रदरेन एसेम्ब्ली धरानका पास्टर साम जी जोनले समारोहमा र डिभोसनमा वचनको सेवा गर्नुभएको थियो।