“अनन्तको निम्ति लगानी” पुस्तक लोकार्पण

ललितपुर- असार २, ‘अनन्तको निम्ति लगानी’ पुस्तक आज विशेष समारोहका बीचमा लोकार्पण भएको छ। पुस्तक लोकार्पण कार्यक्रममा लेखक तथा पास्टर लाजरस थुलुङद्वारा लेखिएको १९ औं पुस्तक “अनन्तको निम्ति लगानी” ज्योति ग्रेट कमीसन फेलोसीप ललितपुरमा लोकार्पण भएको हो। कार्यक्रममा पुस्तकको समालोचना डा महेन्द्र भट्टराई र रुबेन राईले गर्नुभएको थियो। नेपाली ईसाई क्षेत्रमा लाजरस थुलुङका पुस्तकहरू धेरै पाठकलाई मन पर्छन्। सरल भाषा, स्पष्‍ट विषय वस्तु, प्रेरणादाय, व्यवहारिक पक्षलाई समेटिएको र बाइबलीय सिद्धान्तमा लेखिएको हुँदा सबैले मन पराउने गरेका छन्।
पुस्तकको बारेमा केही शब्द राख्‍ने क्रममा लेखकले ‘अनन्तको निम्ति लगानी’ पुस्तक परमेश्वरको वचन पढ्दै जाँदा बाइबलमा मलाकीको पुस्तमा परमेश्वरले भन्नुभएको “मलाई जाँचेर हेर”शब्दले निकै भावुक बनायो। यसै विषयमा केन्द्रित भएर यो पुस्तक लेख्दा अन्य पुस्तकहरूभन्दा लामो समय लागेर लेखेको कुरा लेखक थुलुङले बताउनु भएको थियो। अबका दिनहरूमा नेपालका चर्चहरूबाट मिसनरी पठाउनुपर्छ यसको लागि चर्चहरू दिने कुरामा तयारी हुनु आवश्यक भएको महशुस गर्दै यो पुस्तक तयार गरिएको छ यसले केही सहायता पुर्‍याउने कुरामा लेखक विश्वस्त भएको कुरा व्यक्त गर्नुभएको थियो।
यस पुस्तकलाई बाहिरबाट सरसरती हेर्दा पेपरको क्वालिटी स्तरीय छ, प्रिन्टिङ राम्रो छ, अक्षरको साइज सबैले पढ्न सक्‍ने र आकर्षक तरिकाले डिजाइन गरिएको छ। दुई रङ्गमा प्रिन्ट गरिएकोले थप आकर्षक पनि छ।

“परमेश्वर कहाँ हुनुहुन्छ जब म दु:खमा हुन्छु” पहिलो पुस्तकदेखि लेखन कलालाई निरन्तरता दिने क्रममा लाजरस थुलुङका अहिलेसम्म १९ वटा पुस्तकहरू प्रकाशित भइ सकेका छन्। पाठक वर्गहरूको लागि भाषाको मिठास, नेपाली मौलिकतामा यी पुस्तकहरू पढ्न पाइ्छन्। यी पुस्तकहरूले पाठकहरूलाई ज्ञान मात्रै दिने नभएर सम्बन्धित विषयहरूमा उत्साह दिने पनि गरेका छन्।