१८ औं सार्क सम्मेलन काठमाडौंमा सम्पन्न

‘शान्ति र समृद्धिको लागि गहन एकता’ नाराकासाथ १८ औं सार्क सम्मेलन काठमाडौंमा सम्पन्न भएको छ। नेपालले तेस्रो पटक आयोजना गरेको सार्क सम्मेलन सन २०१४ नोभेम्बर २६ र २७ तारिख अर्थात बुधबार सुरू भएको सम्मेलन बिहीबार साँझ सकिएको छ। २ दिनसम्म चलेको सम्मेलनले ३६ बुँदे घोषणापत्र जारी गरेर समापन भएको छ। घोषणापत्रलाई काठमाडौं घोषणापत्र नाम दिइएको छ। घोषणापत्रमा उर्जा सहकार्यमा सम्झौतासहितका विषयहरू समावेस गरिएको छ। साथै सार्कलाई १५ वर्ष भित्र आर्थिक संघ बनाएर अघि बढ्ने जस्ता विषयहरू समावेस गरिएका छन्।
रेल-वे र सवारी साधनमा प्रारम्भिक सहमति गर्ने र तीन महिनाभित्र टुंगो लगाएर सम्झौता गर्न आठ वटै राष्ट्र सहमत भएका छन्। कुन कुन रुट चयन गर्ने प्राविधिक प्रक्रिया पुरा नभएको कारण यसको प्रारम्भिक सहमति मात्र भएको बताइएको छ। आगामी तीन महिनामा बस्ने कार्यक्रम समितिको बैठकले टुंगो लगाएर ६ महिना पछि हुने मन्त्रीस्तरीय बैठकमा सम्झौता गर्ने र काम गर्ने प्रतिवद्धता जाहेर छ।
सार्क सचिवालयलाई अझ बलियो बनाउने निर्देशहरु सचिव स्तरमा पठाउने लगायतको विषयमा सहमति रहेको छ। यद्यपी घोषणापत्रमा भने सार्कको सुदृढिकरण गर्ने र सार्क सचिवालयलाई बलियो बनाउने विषय रहेको छ।
सार्कमा ब्याप्त आतंकवाद, उग्रवाद र धार्मिक अतिवाद नियन्त्रण गर्नका लागि संयन्त्र बनाएर अघि बढ्ने उल्लेख छ। यसअघिका प्रतिवद्धता पुरा गर्नका लागि पनि विभिन्न उपसमितिहरु बनाएर काम अघि बढाउने जस्ता विषयहरु परेका छन् । भिसा सरलीकरण जन स्तरको सम्वधलाई स्थापित गराउने विषय पनि यसमा परेको छ। गरिबी, भोकमरी, आतङकवाद, सीमापार अपराध, साना हतियार तथा लागू पदार्थको ओसारपसारको नियन्त्रणमा घोषणामा जोड गर्ने भएको छ।