यात्रुवाहक वसमा आगजनी

वैद्य नेतृत्वको नेकपा-माओवादी सहित ३३ दलले गरेको शान्तिपूर्ण आन्दोलनले हिंसात्मक रुप लिएको छ। विभिन्न ठाउँमा गुडिरहेको सवारीसाधनमा यात्रुसहित पेट्रोल बम प्रहार गरी थुप्रै यात्रु घाइते भएका छन्।  प्रहरी स्कर्टिङ्मा पश्चिम तर्फ गएको बसमा शुक्रवार विहान बन्दकर्ताले आगजनी गरिदिएका छन् । बिहीबार काठमाडौबाट प्रहरी स्कर्टिङ्मा तुलसीपुर गएको  ना ३ ख ९६९६ नम्बरको बस दाङ्को तुल्सीपुरमा बन्दकर्ताले जलाएका छन् । बसमा बिहान करिव ४ वजे अज्ञात समुहले आगजनी गरेको प्रहरीले जनाएको छ ।

बर्दियाको गुलरियामा एकिकृत नेकपा माओवादीका उम्मेद्वार तलिकराम शर्माको गाडीमा अज्ञात समुहले आगजनी गरेको छ । गुलरियामा रोकी राखेको शर्माको भे १ ज ३४३ नम्बरको गाडीमा आगजनी गरिएपछि प्रहरीले आगो लगाउने समुहको खोजी कार्य तिव्र पारेको छ ।

यस्तै कलैयाबाट काठमाडौका लागि छुटेको ना ४ ख ९८६३ नम्बरको सार्वजनिक बसमा मकवानपुरको बसामाडीस्थित ताप्केमा पेट्रोल बम प्रहार भएको छ ।

बिहीबार राती अज्ञात समूहले प्रहार गरेको पेट्रोल बमबाट १२ जना यात्रु घाइते भएको जसमध्ये ३ जनाको अवस्था गम्भीर रहेको प्रहरीले जनाएको छ । उनीहरुको थप उपचारका लागि भरतपुर अस्पताल रिफर गरिएको प्रहरीले जनाएको छ । अरु ३ जना घाइतेको वीरगञ्जमा र ६ जनाको हेटौँडा अस्पतालमा उपचार भइरहेको छ ।

आफ्नो पार्टीको नीति निर्वाचन वहिस्कार गर्ने हो भन्दैमा ठाउँ ठाउँमा विष्फोटक पदार्थ बम पटकाएर, गाडी जलाएर सर्वसाधरण जनतामाथि बम प्रहार गराउनुले नत दलको भलो हुन्छ न त राष्ट्रको नै।  खुलेआम हिंसाजन्य घटना गर्नेलाई पक्राउ गरी सर्वसाधरणको सुरक्षा दिन सरकार अग्रसर हुनुपर्छ। धेरै ठाउँमा आगजनी गर्नेकाम अज्ञात समूहले भनिएको छ भने बन्दकर्ताहरू हामी कडारुपमा बन्द गर्छौं भनेको अवस्था छ।