०५ मंसिर २०८३, शनिबार
काठमाडौं । सुदूरपश्चिम रोयल्सले नेपाल प्रिमियर लिग (एनपीएल) को तेस्रो संस्करणको उपाधि जितेको छ। शनिबार कीर्तिपुरस्थित त्रिवि अन्तर्राष्ट्रिय क्रिकेट मैदानमा भएको फाइनलमा साविक विजेता लुम्बिनी लायन्सलाई १० विकेटले पराजित गर्दै सुदूरपश्चिम पहिलो पटक च्याम्पियन बनेको हो।
लुम्बिनीले दिएको १५६ रनको लक्ष्य सुदूरपश्चिमले १३.३ ओभरमै बिना विकेटको क्षति पूरा गर्यो। यससँगै लगातार तेस्रो पटक फाइनल पुगेको सुदूरपश्चिमले अघिल्ला दुई संस्करणको निराशालाई अन्त्य गर्दै उपाधि उचाल्यो।
टस जितेर पहिले बलिङ रोजेको सुदूरपश्चिमले लुम्बिनीलाई २० ओभरमा ६ विकेट गुमाएर १५५ रनमा रोकेको थियो। लुम्बिनीका लागि दिलीप नाथले अविजित ३९ रन बनाए। कप्तान रोहित पौडेलले ३०, निरोशन डिकवेलाले २८ तथा डार्सी सर्टले २१ रनको योगदान दिए।सुदूरपश्चिमका स्कट कुगेलेइनले दुई विकेट लिए। हेमन्त धामी, थारिन्दु रत्नायके र कप्तान दीपेन्द्रसिंह ऐरीले एक–एक विकेट हात पारे।
१५६ रनको लक्ष्य पछ्याउने क्रममा सुदूरपश्चिमका ओपनर जर्ज मन्सीले आक्रामक ब्याटिङ गर्दै अविजित १२५ रन बनाए। उनले ५४ बलमा आठ चौका र १२ छक्का प्रहार गरे। अर्का ओपनर विनोद भण्डारीले २७ बलमा अविजित ३० रन जोडे। यी दुईले पहिलो विकेटका लागि अविजित १५८ रनको साझेदारी गर्दै सुदूरपश्चिमलाई सहज जित दिलाए। मन्सीको शतक केवल ४९ बलमा पूरा भएको थियो।
सुदूरपश्चिम लगातार तेस्रो पटक एनपीएलको फाइनलमा पुगेको थियो। यसअघि पहिलो संस्करणमा जनकपुर बोल्ट्ससँग र दोस्रो संस्करणमा लुम्बिनी लायन्ससँग पराजित भएको थियो।
यस पटक पनि फाइनलमा लुम्बिनीसँगै भेट हुँदा सुदूरपश्चिमले अघिल्ला हारको बदला लिएको छ। अर्कोतर्फ, साविक विजेता लुम्बिनीको लगातार दोस्रो पटक उपाधि जित्ने लक्ष्य भने पूरा हुन सकेन।















Discussion about this post