०५ मंसिर २०८३, शनिबार
काठमाडौं । नेपाल प्रिमियर लिग (एनपीएल) को तेस्रो संस्करणको उपाधिका लागि आज शनिबार साविक विजेता लुम्बिनी लायन्स र सुदूरपश्चिम रोयल्स आमनेसामने हुँदैछन्। कीर्तिपुरस्थित त्रिवि अन्तर्राष्ट्रिय क्रिकेट मैदानमा हुने फाइनल खेलमा लुम्बिनी लगातार दोस्रो पटक उपाधि जित्ने लक्ष्यमा हुनेछ भने सुदूरपश्चिम पहिलो पटक च्याम्पियन बन्ने प्रयासमा मैदान उत्रनेछ।
एनपीएलको अघिल्लो संस्करणको फाइनलमा पनि यी दुई टोलीबीच प्रतिस्पर्धा भएको थियो। त्यसबेला लुम्बिनीले सुदूरपश्चिमलाई ६ विकेटले पराजित गर्दै उपाधि जितेको थियो। त्यसैले यसपटकको फाइनल सुदूरपश्चिमका लागि अघिल्लो हारको बदला लिने र इतिहास बदल्ने अवसरसमेत बनेको छ।
सुदूरपश्चिम लगातार तेस्रो पटक फाइनल पुगेको टोली हो। पहिलो संस्करणको फाइनलमा जनकपुर बोल्ट्ससँग पराजित भएको सुदूरपश्चिम दोस्रो संस्करणमा पनि लुम्बिनीसँग उपाधि भिडन्तमा चुकेको थियो। लगातार दुई पटक फाइनलमा पराजित भएको टोली यसपटक भने उपाधि जित्दै आफ्नो प्रतीक्षालाई अन्त्य गर्न चाहन्छ।
लुम्बिनीको यात्रा भने यस संस्करणमा तुलनात्मक रूपमा प्रभावशाली रह्यो। लिग चरणमा शीर्ष स्थान हासिल गर्दै पहिलो क्वालिफायरमा स्थान बनाएको लुम्बिनीले त्यहाँ सुदूरपश्चिमलाई ६ विकेटले हराउँदै सिधै फाइनलमा प्रवेश गरेको थियो। टोलीले लिग चरणमा एक खेलमा मात्र हार बेहोरेको थियो।
सुदूरपश्चिमले भने पहिलो क्वालिफायरमा लुम्बिनीसँग पराजित भएपछि दोस्रो क्वालिफायरमार्फत फाइनल यात्रा तय गरेको हो। चितवन राइनोजविरुद्धको खेलमा सुदूरपश्चिमले १३४ रनको लक्ष्य पछ्याउँदै सात विकेटको जित निकालेको थियो। उक्त जितमा थारिन्दु रत्नायकेले अविजित ५३ रन बनाए भने स्कट कुग्गेलाइनले तीन विकेट लिएका थिए।
फाइनलमा लुम्बिनीको बलियो पक्ष उसको अनुभव र दबाबपूर्ण खेलमा देखिएको प्रदर्शन हुनेछ। कप्तान रोहित पौडेलको नेतृत्वमा रहेको टोलीमा निरोशन डिकवेल्ला, रुबेन ट्रम्पेलम्यान र शेर मल्लजस्ता खेलाडी निर्णायक बन्न सक्छन्। विशेषगरी ट्रम्पेलम्यानले बलिङमा प्रभाव पार्दै आएका छन्।
सुदूरपश्चिमको आशा भने कप्तान दीपेन्द्रसिंह ऐरी, थारिन्दु रत्नायके र स्कट कुग्गेलाइनमा रहनेछ। ऐरीले ब्याटिङमा टोलीलाई सम्हाल्दै आएका छन् भने रत्नायकेले कठिन परिस्थितिमा खेल जिताउने क्षमता देखाएका छन्। कुग्गेलाइनको बलिङ पनि लुम्बिनीका ब्याटरका लागि चुनौती बन्न सक्छ।
यसअघि भएका भेटमा लुम्बिनीले सुदूरपश्चिममाथि दबदबा कायम राखेको छ। जारी संस्करणको उद्घाटन खेल र पहिलो क्वालिफायरमा पनि लुम्बिनीले सुदूरपश्चिमलाई हराएको थियो। त्यसैले फाइनलमा लुम्बिनी आफ्नो पुरानो लय कायम राख्ने योजनामा हुनेछ भने सुदूरपश्चिम विगतको नतिजा उल्ट्याउने दाउमा हुनेछ।
आजको फाइनल खेल दिउँसो ४:३० बजे सुरु हुनेछ। दुवै टोलीका लागि यो केवल उपाधिको प्रतिस्पर्धा मात्र नभई एनपीएलको इतिहासमा आफ्नो स्थान अझ बलियो बनाउने अवसर पनि हो। लुम्बिनी उपाधि रक्षा गर्दै आफ्नो वर्चस्व कायम राख्न चाहन्छ भने सुदूरपश्चिम लगातारको फाइनल यात्रालाई पहिलो उपाधिमा परिणत गर्न चाहन्छ।
















Discussion about this post