समाधिस्थल व्यवस्थापन गर्न वन तथा वातावरण मन्त्री विशाल खड्का सकारात्मक

बैशाख ०७९ । ललिपतुर । वागमती प्रदेशका वन तथा वातावरण मन्त्री विशाल खड्काले इसाईहरुको निम्ति समाधिस्थलको व्यवस्थापन गर्न आफू सकारात्मक भएको बताउनु भएको छ ।

राष्ट्रिय गिर्जाघर महागुठी (ट्रस्ट) नेपालले नयाँ वर्षको अवसरमा भैसेपाटीको ग्रेस होटलमा आयोजना गरेको शुभकामना आदान–प्रदान तथा सदस्यता प्रमाण–पत्र कार्यक्रममा उहाँले सो कुरा बताउनु भएको हो ।

कार्यक्रममा मन्त्री खड्काले आफू इसाईहरुसँग निकै निकट् रहेको भन्दै तत्कालिन स्कूले अवस्थामा आफू माओवादीमा विद्रोहमा नलागेको भए सायद इसाई भएर तपाईहरु जस्तै चर्चमा सेवा गरि रहेको हुन्थे भन्नु भयो ।

राष्ट्रिय गिर्जाघर महागुठीको अनुरोधमा समाधिस्थल व्यवस्थापन गर्न वागमती प्रदेश सरकार सकारात्मक भएपछि गिर्जाघर महागुठीका सहसंयोजक तथा प्रवक्ता पास्टर किरणकुमार दासले एनसीएफ, एनसीएस र राष्ट्रिय ख्रीष्टियान महासंघसँगको सहकार्यमा प्रदेश सरकारसँग कार्यान्वयनको लागि अघि वढ्ने बताउनु भएको छ ।

उहाँले भविष्यमा प्रदेश सरकारबाट उपलब्ध हुन सक्ने समाधिस्थल व्यवस्थापनको लागि महागुठीले एनसीएफ नेपाल, एनसीएस नेपाल र राष्ट्रिय खीष्टियन महासंघ नेपालसँग संयोजन गरेर निकट् भविष्यमा एक कार्यदल गठन गरेर अघि वढ्ने बताउनु भएको छ ।

कार्यक्रममा राष्ट्रिय गिर्जाघर महागुठी (ट्रस्ट) नेपालका पदाधिकारीहरूलाई मन्त्री खड्काको वाहुलीबाट गिर्जाघर महागुठीको कार्य समितिका ३८ पदाधिकारीहरुलाई सदस्यताको प्रमाण पत्र वितरण गरिएको थियो ।

कार्यक्रममा अर्का अतिथि नेकपा एमालेका नेता माननीय सांसद जीवन खड्काले कम्युनिष्टहरूकै कारणले नेपाल धर्मनिरपेक्ष मुलुक भएको बताउँदै आउँदा दिनमा नेपाली जनताले यसको मुल्याङ्कन गर्नु पर्ने बताउनुभयो ।
उहाँले नयाँ वर्षको अवसरमा शुभकामना पनि व्यक्त गर्नु भयो ।

त्यस्तै, कार्यक्रममा अधिवक्ता केदार खड्काले धर्म निरपेक्ष मुलुकमा अल्पसंख्यका इसाई धर्मावलम्वीहरुको समाधिस्थलको व्यवस्थापन गर्नु नेपाल सरकारको दायित्व भएको औंल्याउनु भयो । उहाँले अहिलेसम्म नेपाल सरकारले इसाईहरुको लागि भनेर समाधिस्थल व्यवस्थापन गर्न नसक्नु धर्म निरपेक्षताको उपहास भएको टिप्पणी गर्नु भयो ।

कार्यक्रममा राष्ट्रिय गिर्जाघर महागुठीका पदाधीकारीहरुको उपस्थिति थियो । कार्यक्रम महागुठी नेपालका सहअध्यक्ष इन्द्र थापाका अध्यक्षतमा सम्पन्न भएको थियो ।

साभार:Turahi.com