धरान- पूर्वाञ्चलको सुन्दर शहर धरानमा आइटीन पाठ्यक्रम अध्ययनरत पास्टर अगुवा तथा विद्यार्थीहरूको लागि चैत्र ८ गते मंगलबारका दिन एलोहिम चर्च धरानमा आइटीन दीक्षान्त समारोह भव्यरूपमा सम्पन्न भएको छ। दिक्षान्त समारोहमा ७५ जना विद्यार्थीहरुले “एन इन्ट्रोडक्सन टु बिब्लिकल स्टडीज” को प्रमाणपत्र प्राप्त गर्नुभएको छ। यसपटकको दिक्षान्त समारोमा एलोहिम चर्च धरान, धरान ब्रद्रेन एसेम्बली, चर्च अफ गड धरान र सियोन मेथोडिस्ट चर्च धरानबाट गरी ७५ जना पास्टर अगुवा तथा विद्यार्थीहरूले प्रमाणपत्र पाउनुभएको हो। समारोहमा एलोहिम चर्चबाटमात्रै १० वटा समूहबाट ५६ जनाले प्रमाणपत्र प्राप्त गर्नुभएको छ।
दीक्षान्त समारोहमा सुरूको प्रार्थना एलोहिम चर्चका सहायक पास्टर भिसन थापाले गर्नुभएको थियो। दीक्षान्त समारहोमा धरान पास्टर अगुवा संघका अध्यक्ष मनी राईले बाइबलबाट नुन र ज्योतिको महत्वलाई प्रकाश पार्दै हामी ख्रीष्टियनहरूले नुन र ज्योतिको काम समाजमा गर्नुपर्ने कुरामा जोड दिंदै उत्साहको वचन दिनुभएको थियो। भरपूर जीवन, भरपूर ज्योति र ख्रीष्टको जीवनी १ पुरा गरेका ७५ जना विद्यार्थीहरूलाई एन इन्ट्रोडक्सन टु बिब्लिकल स्टडीजको प्रमाणपत्र वितरण गरिएको हो। दिक्षान्त समारोहमा धरान इसाई समाजका अध्यक्ष कमल ह्यूज, धरान ख्रीष्टियन समाजका अध्यक्ष पास्टर सूर्य तामाङ र धरान इसाई संघका अध्यक्ष पास्टर मनी राईको हातबाट प्रमाण पत्र र उपहार वितरण गरिएको थियो।
समारोहमा ८ जना शिक्षकहरू पास्टर मनी गुरूङ, पास्टर ध्रुब श्रेष्ठ, सहायक पास्टर भिषण थापा, एल्डर सन्जीप बान्तवा, क्वायर लिडर दिनेश दर्नाल, कोपिला लिम्बु, पञ्चकला राई, र बिनिता लिम्बुलाई आइटीनबाट ससम्मान प्रशंसा पत्र र उपहार ब्रद्रेन एसेम्बलीका पास्टर साम जी जोनको हातबाट वितरण गरिएको थियो।
समारोहमा प्रमाणपत्र पाउनुभएका पास्टर अगुवा तथा विद्यार्थीहरूको निम्ति पूर्वाञ्चल ख्रीष्टियन समाजका अध्यक्ष पास्टर कुबेर गुरूङले आशिष्को प्रार्थना गरिदिनुभएको थियो र सोही क्रममा दीक्षान्त हुनुभएका विद्यार्थीहरूलाई पूर्वाञ्चल ख्रीष्टियन समाजको तर्फबाट वधाई तथा शुभकामना सन्देश पनि दिनुभएको थियो।
समारोहको अन्तमा सर्जु रिजालले आइटीनको सेवा र प्रभावको बारेमा बताउदै मण्डली भन्दा ठूलो अरुकेहि हुन नसक्ने कुरा भन्दै मण्डलीलाई बलियो बनाउन परमेश्ववरको वचन अध्ययनलाई प्रार्थामिकता दिनुपर्ने कुरामा जोड दिनुभएको थियो। अन्तमा एलोहिम चर्चका पास्टर मनी गुरूङले आशिष्को प्रार्थना गरी कार्यक्रमको अन्त्य भएको थियो।
Discussion about this post