कामना सेवा विकास बैंकको चालु आर्थिक वर्षको पहिलो त्रैमासमा खुद नाफा १७ प्रतिशतले बढ्यो

११ कात्तिक २०८३, बुधबार

काठमाडौं : कामना सेवा विकास बैंक लिमिटेडले चालु आर्थिक वर्ष २०८३/८४ को पहिलो त्रैमासमा सन्तोषजनक वित्तीय प्रगति हासिल गरेको छ। बैंकद्वारा सार्वजनिक चालु आर्थिक वर्षको पहिलो त्रैमासिक वित्तीय विवरण अनुसार समीक्षा अवधिमा बैंकले २३ करोड ११ लाख ५५ हजार रुपैयाँ खुद नाफा आर्जन गर्न सफल भएको छ, जुन गत आर्थिक वर्षको सोही अवधिको तुलनामा १६.९९ प्रतिशतले बढी हो । गत वर्षको पहिलो त्रैमासमा बैंकले १९ करोड ७५ लाख ८४ हजार रुपैयाँ खुद नाफा कमाएको थियो ।

व्यवसाय विस्तारतर्फ बैंकको निक्षेप संकलन र कर्जा लगानीमा सकारात्मक वृद्धि देखिएको छ । असोज मसान्तसम्म बैंकले ६७ अर्ब ९० करोड ४७ लाख रुपैयाँ निक्षेप संकलन गरी ५६ अर्ब ३४ करोड़ ५३ लाख रुपैयाँ कर्जा लगानी गरेको छ । यो गत वर्षको सोही अवधिको तुलनामा निक्षेपमा २.६० प्रतिशत र कर्जामा ३.९५ प्रतिशतको वृद्धि हो । यससँगै बैंकको खुद ब्याज आम्दानी १.४३ प्रतिशतले बढेर ६२ करोड ६४ लाख रुपैयाँ पुगेको छ भने बैंकको लाभांश क्षमता १५.७६ प्रतिशत (वितरणयोग्य नाफा १५ करोड २१ लाख रुपैयाँ) कायम भएको छ ।

यसैगरी, बैंकले जोखिमयुक्त सम्पत्ति व्यवस्थापनमा सुधार गर्दै खराब कर्जा (एनपीएल) घटाउन उल्लेखनीय सफलता हासिल गरेको छ । गत वर्षको असोज मसान्तमा ४.४१ प्रतिशत रहेको खराब कर्जा अनुपात चालु आर्थिक वर्षमा घटेर ३.९३ प्रतिशतमा झरेको छ । खराब कर्जामा आएको यस ्रामो सुधारसँगै बैंकको इम्पेरिमेन्ट चार्ज (सम्भावित नोक्सानी व्यवस्था) पनि ११ करोड ६ लाख रुपैयाँबाट घटेर ४ करोड ९४ लाख रुपैयाँमा सीमित भएको छ । बैंकको प्रतिसेयर आम्दानी (EPS) पनि २०.४६ रुपैयाँबाट बढेर २३.१३ रुपैयाँ पुगेको छ भने प्रतिसेयर नेटवर्थ १६१.८४ रुपैयाँ रहेको छ ।