उद्देश्य प्राप्तिसँगै तपाईंले शान्ति अनुभव गर्नुहुनेछ

बुधवार, जुन ८, जेठ २६
‘तिमीहरू…शान्तिमा डोर्‍याइनेछौ ।’ —यशैया ५५:१२
सायद तपाईं यस्तो विचार गर्दैहुनुहुन्छ, ‘मैले मेरो जीवनमा के गर्नुपर्छ होला ? यस संसारमा मेरो उद्देश्य के होला ?’ हाम्रा क्षमताहरूद्वारा परमेश्वरले यी प्रश्नहरूको उत्तर दिनुहुन्छ । उहाँले हामीलाई दिनुभएका सीप र क्षमताहरूद्वारा परमेश्वरले हामीलाई हाम्रो जीवनको उद्देश्यसम्म डोर्‍याउनुहुन्छ । परमेश्वरले दिनुभएका क्षमताहरू ती सीपहरू हुन् जसद्वारा कुनै व्यक्तिले कुनै काम सजिलै गर्नसक्छ, प्रायः कुनै औपचारिक तालिमाबिना नै । हामी स्वाभाविक रूपमा जे काम असल तरिकाले गर्नसक्छौँ, त्यो काम गर्दा हामीलाई ठूलो आनन्द हुन्छ । यसकारण यदि तपाईं आफ्नो जीवनको उद्देश्यको बारेमा निश्चित हुनुहुन्न भने, तपाईं जुन काम असल तरिकाले गर्न सक्नुहुन्छ, त्यो काम गर्नुहोस् । अनि परमेश्वरले तपाईंको प्रयासलाई आशिष् दिनुभएर तपाईंको उद्देश्यलाई निश्चित गरिदिनुभएको तपाईंले देख्नुहुनेछ । तपाईंसँग जुन काम गर्ने क्षमता छैन त्यो काम गर्न कोसिस गर्दै, वा अर्को कोही व्यक्तिले असल तरिकाले गरेको काम गर्न कोसिस गर्दै आफ्नो समय नबिताउनुहोस् । हामीले गरेको कामले अरूहरूलाई जीवन दिन्छ भने हामीले आफ्नो वरदान र बोलावटअनुसार काम गरिरहेकाछौं भन्ने कुरा हामीलाई थाहा हुन्छ । यदि हामीले गरेको कामले हामीलाई दुःखित बनाउँछ र त्रासले भर्छ भने, प्रायः हामी परमेश्वरको सिद्ध इच्छमा हुँदैनौँ । उहाँको सिद्ध योजना पूरा गरिरहेका छौं भन्ने कुरा हामीलाई थाहा दिन उहाँले हामीलाई शान्ति र आनन्द दिनुहुन्छः ‘तिमीहरू आनन्दसाथ जानेछौ र शान्तिमा डोर्‍याइनेछौ ।’ तपाईंले कुन कुरामा आनन्द पाउनुहुन्छ, कुन कुरा असल तरिकाले गर्न सक्नुहुन्छ, अनि कुन कुरा गर्न परमेश्वरले तपाईंलाई अनुग्रह दिइरहनुभएको छ भन्ने बारेमा विचार गर्नुहोस्— अनि तपाईंको जीवनमा परमेश्वरलाई परमेश्वरकै स्थान दिनुहोस् । उहाँ तपाईंद्वारा बग्न चाहनुहुन्छ, अनि यो कुरा उहाँ अरूहरूद्वारा बग्नुभएजस्तै रूपमा नहुन सक्छ । तपाईंमा र तपाईंद्वारा काम गर्न सक्नुहुने उहाँको क्षमतामाथि भरोसा राख्नुहोस्, अनि अरूहरूभन्दा फरक हुन नडराउनुहोस् । हामी प्रत्येकको निम्ति परमेश्वरसँग एउटा विशेष् स्थान र विशेष् योजना छ । तपाईं उहाँको योजना पूरा गर्दै सही स्थानमा हुनुहुन्छ भन्ने कुरा तपाईंले कसरी थाहा पाउनुहुनेछ त ? तपाईंले पाउनुहुने शान्तिद्वारा !
आत्मिक भोजनः इजकिएल २०–२१, मत्ती १७: १–१३, भजन १३२:१–१०, हितोपदेश १५: १–४