राष्ट्रिय ख्रीष्टियन महासंघ नेपालले एक पत्रकार सम्मेलन गरेर आफ्ना तिन बुंदे माग यथासिघ्र पुरा गर्न सरकारसँग माग गरेको छ । योगम्बर पार्टी भेन्यु सिंहदरबारमा आयोजित पत्रकार सम्मेलनमा महासंघका महासचिव सी.वि. गहतराजले आफ्ना मागहरू प्रस्तुत गर्नुभएको थियो ।पत्रकार सम्मेलनमार्फत महासंघले सरकारसँग गरेका मागहरू यसप्रकार छन्:
१) अब बन्न गइराखेको नेपालको संबिधान २०७२ को संबिधान मस्यौदामा धर्मनिरपेक्षतालाई अपरिवर्तनीय धारामा नराखिएकाले संविधानको प्रस्तावनामै धर्मनिरपेक्षता समावेश गरियोस् ।
२) नेपाल सरकार र महासंघ बिचमा यसअघि भएका ३ बुंदे र ६ बुंदे माग यथासिघ्र कार्यान्वयन गरियोस् ।
३) मृत्यूसंस्कार जस्तो संबेदनशील विषयलाई मध्येनजर गरि उपत्यका लगायत देशभरका सबै जिल्लाहरुमा यथासिघ्र समाधिस्थलको व्यवस्था गरियोस् ।
महासंघ र नेपाल सरकारका बिचमा यसअघि भएका ३ बुंदे र ६ बुंदे मागहरू बर्षौं बितिसक्दा पनि पुरा नभएकोमा महासंघले गम्भीर आपत्ति प्रकट गरेको छ । २०६८ साल बैसाख १८ गते भएको ३ बुंदे र २०६९ साल जेठ १३ गते भएको ६ बुंदे सम्झौतामा धेरै महत्वपूर्ण तथा संबेदनशील विषयहरूमा सहमति भएको भएता पनि आजसम्म पुरा गर्ने संकेतसम्म देखा नपरेकाले अब यथासिघ्र ति मागहरू कार्यान्वयन हुने वातावरण सिर्जना गर्न महासंघले माग गरेको छ ।
सम्झौतामा समाधिस्थलको यथासिघ्र ब्यबस्थापन गरिने, राष्ट्रिय ख्रीष्टियन आयोग गठन गरिने, राज्यका सबै निकायहरूमा ख्रीष्टियन प्रतिनिधित्वको पहल गरिने, इष्टर सन्डेका दिन सार्वजनिक बिदा दिन पहल गर्ने लगायतका सहमति भएका थिए ।
महासंघका अध्यक्ष डा. सुन्दर थापाको अध्यक्षतामा सम्पन्न भएको पत्रकार सम्मेलनमा सहअध्यक्ष डा. इसुजंग कार्की र सल्लाहकार डा. केबी रोकायाले आफ्नो भनाई राख्नुभएको थियो । कार्कीले नेपाल सरकारले समाधिस्थलका बारेमा मात्रै नभई अरू थुप्रै कुराहरूमा समेत धार्मिक विभेद गरेको बताउनुभयो । हालसालै गएको भूकम्पले भत्काएका थुप्रै मन्दिरहरू बनाउने तयारि गरिएको भएता पनि भत्किएका सयौं चर्चहरूलाई सरकारले वास्तासमेत् नगरेको उहाँको गुनासो थियो । रोकायाले देशमा धार्मिक स्वतन्त्रता अपरिहार्य रहेको र धार्मिक स्वतन्त्रताको अन्तराष्ट्रिय मान्यता अन्तर्गत आफुले चाहेको धर्म मान्न पाउने, धर्म परिवर्तन गर्न पाउने र धर्म त्याग्न पाउने अधिकार पर्ने बताउनुभयो । उहाँले भन्नुभयो,”राज्यले सबैलाई समान व्यबहार गरेर देशबिकासमा लाग्नु नै आजको आवश्यकता हो ।”
महासंघले २०७२ साल असार २७ गते आइतबार योगम्बर पार्टी भेन्युमा नै धर्मनिरपेक्षताको सम्बन्धमा बहस कार्यक्रम राखेको छ ।
Discussion about this post