मतदान गरी संविधान सभाको लागि असल व्यक्ति छनौट गरौं

२०६२/६३ को ऐतिहासिक जनआन्दोलनको परिवर्तनलाई संस्थागत गर्नको लागि नेपाली जनताले आफ्नो संविधान आफै लेख्न पहिलो पटक २०६४ सालमा संविधानसभाको निर्वाचन भएको थियो तर  दुई वर्षको लागि गठन भएको संविधानसभाबाट चार वर्षसम्म पनि संविधान बन्न नसकेपछि पहिलो संविधानसभा विघटन भएको थियो ।

लामो राजनीतिक अन्योलका बीच पुन: मंसिर ४ गते निर्वाचन गर्ने सहमति अनुसार प्रक्रिया अघि बढ्यो । केहि दलहरू निर्वाचनको वहिस्कारमा उत्रिएको अवस्थामा भोलि मंसिर ४ गते मंगलबार विहान ७ बजेदेखि वेलुका ५ बजेसम्म हुने निर्वाचनमा देशभर कुल १ करोड २१ लाख ४७ हजार ८ सय ६५ जना मतदाता रहेका छन् । यसपटकको निर्वाचनमा विभिन्न १ सय २८ दलहरु सहभागी छन् भने प्रत्यक्षतर्फ दल र स्वतन्त्र गरी ६ हजार १ सय २८ जना उम्मेदवारहरु चुनावी मैदानमा छन् । यस्तै देशभर एक निर्वाचन क्षेत्र हुने समानुपातिकतर्फ १० हजारभन्दा बढी उम्मेदवारहरु रहेका छन् ।

मंसिर ३ गते सोमबारबाट नेपाल–भारत सीमा पनि बन्द भइसकेको छ । तर चुनाव विथोल्ने अभियानसहित आन्दोलनमा उत्रिएको नेकपा–माओवादीका कारण मतदाताहरू भने सुरक्षाको विषयमा ढुक्क हुन सकेका छैनन् । झण्डै २ लाख सुरक्षाकर्मी परिचालन गरिएको चुनावी सुरक्षामा गृहमन्त्रीदेखि सुरक्षा प्रमुखहरु योजना बनाउन, निर्देशन दिन र देशभरीको रिपोर्ट लिन २४ सैं घन्टा व्यस्त छन् । सरकारी सुरक्षा योजनाअनुसार मतदानस्थलको पहिलो घेरामा करिव ४८ हजार नेपाल प्रहरी, दोस्रो घेरामा २९ हजार सशस्त्र प्रहरी र त्यसपछि तेस्रो घेरामा ६२ हजार सेना सुरक्षा घेरा देखिन्छन् । ४५ हजार म्यादी प्रहरीसँगै झण्डै ५ सयको संख्यामा अनुसन्धान विभागका कर्मचारी पनि सुरक्षा सहयात्रामा छन् ।

निर्वाचन सुरक्षाका लागि पाँचै विकास क्षेत्रमा हेलिकप्टर तैनाथ राखिने छ । हेलिकप्टर तैनाथीको र मतदान अवधिभर हुने हवाई गस्ती सेनाकै जिम्मामा छ । सैनिक प्रवक्ता जगदिशचन्द्र पोखरेलका अनुसार घटना तत्काल नियन्त्रणमा लिन सेना पनि हाइअलर्टमा रहनेछ । मतदानस्थलको सुरक्षामा कुनै कसर बाँकी नराख्ने सरकारले दावी गरेपनि बहिष्कार समुह चुनावका दिन मतदाता रोक्न गाउँतिर केन्द्रित रहने सम्भावनालाई ध्यानमा राखि त्यतातिर पनि सुरक्षा सर्तकता बढाउनुपर्ने विज्ञहरुको सुझाव छ ।