कालीमाटी तरकारी बजारमा भिषण आगलागी

काठमाडौं, March 4 – काठमाडौंको मुख्य तरकारी बजार कालिमाटीमा शनिबार राति भिषण आगलागी हुँदा ६ जनाको मृत्यु भएको छ। एकै परिवारका ४ जनाको जलेर मृत्यु भएको छ। मृत्यु हुनेमा कालिमाटी तरकारी बजारका सुरक्षागार्ड हीराबहादुर पुन, उनकी छोरी १६ वर्षीया शान्ति पुन, १४ वर्षीया नीरा पुन र १२ वर्षीय छोरा निराजन पुन रहेका छन्। थप दुईको जनाको सनाखत हुन सकेको छैन। हीराबहादुरकी श्रीमती हिक्का पुनको सैनिक अस्पताल छाउनीमा उपचार भइरहेको छ । तरकारी बजारमा भरियाको काम गर्ने गोरखाका बलबहादुर श्रेष्ठ घाइते छन्। आगोमा परेर मृत्यु हुने एकजनाको खुट्टा बिहान मात्र फेला परेको थियो । आगोमा परेर एउटा कुकुर समेत मरेको थियो। स्थानियबासी केदार बास्कोटाका अनुसार तरकारी बजारमा राति करिब १० बजेर १५ मिनेट जाँदा आगो लागेको हो। लोडसेडिङको कारणले १० बजे बत्ती आएको थियो। तार सट भएर आगो लागेको अनुमान गरिएको छ। कालीमाटी तरकारी गोदाममा प्लास्टीकका सामान, बाँसका सामाग्री, जुटका बोरा, तेल, घ्यू जस्ता सामान भएकोले आगो दन्किएको केदार बास्कोटा बताउनुहुन्छ। एउटै व्यक्तिको लाखौको सामान नष्ट भएको छ। दाल, सिमी जस्ता सामानको गोदाम भएकोले आगो नियन्त्रणमा लिन गाह्रो भएको थियो। तीन सय तरकारी पसल आगोले सबै ध्वस्त भएकाछन् । आइतबार बिहान ११ बजे मात्र आगो पूर्ण रूपमा नियन्त्रणमा आएको थियो। आगो लागेको १०/१५ मिनेट मै दमकल घटनास्थलमा आइपुगेको थियो। सुरक्षाकर्मीहरूको सहयोगमा र आठवटा दमकल, क्रेन र पानी ट्यांकरहरू प्रयोग गरिएका थिए। श्रीमती सावित्री बास्कोटा भन्नुहुन्छ। “दसबजेतिर कौसीमा निस्केर हेर्दा तरकारी पसलमा आगोको ठूलो ठूलो लप्का आफ्नो घरतिर आएको देख्दा म आत्तिएँ, मैले केही पनि सम्झिन सकिन मलाई कसले समाएर लिए थाहै पाइन। प्रभु बचाउनुहोस भन्ने शब्द मात्रै मुखबाट निस्कियो। केहीसमयपछि दमकलको आवाज सुनेपछि बल्ल अब केही हुँदैन भनी ढुक्क भए। ‘रातभर सुत्न पाइएको छैन प्रभुको अनुग्रहले बाँचियो। तरकारी पसल पनि केही भएको छैन। उप प्रधान तथा गृहमन्त्री बिजयकुमार गच्छदार दिउँसो १२ बजे घटनास्थल पुगेर प्रहरी र तरकारी व्यवसायीसँग जानकारी लिनुभएको थियो। उहाँले घटनाका क्रममा मृतकहरूलाई राहत व्यवस्था र घाइतेलाई औषधोपचारको व्यवस्था गरिने बताउनुभएको थियो। ‘सुरक्षा निकायको सक्रियताका कारण समयमा नै आगो नियन्त्रणमा लिएका कारण थप क्षति हुन पाएन’ उहाँले भन्नुभयो, ‘तरकारी जलेर नष्ट हुनेका लागि पनि सरकारले राहतको व्यवस्था गर्नेछ।’ क्षति मूल्याङ्कन समितिले गरेको मूल्याङ्कनका आधारमा क्षतिपूर्तिको व्यवस्था गरिने बताउनु भएको थियो।

Republished in new layout 7/3/2013