पोखरामा यति एयरलाइन्सको विमान दुर्घटना भएको छ। काठमाडौँबाट विहान १०ः३३ बजे पोखराका लागि उडेको यति एयरलाइन्सको एटीआर-७२ विमान दुर्घटना भएको हो।
दुर्घटनामा परेका ७२ जनामध्ये ६३ जनाको शव अस्पतालमा पुराइएको छ। तीनजनाको शव सेतीको खोँचमा देखिएको छ तर माथि ल्याउन सकिएको छैन भने छजना यात्रुको अवस्था भने अझै अज्ञात रहेको छ।
उद्धार कार्यको नेतृत्व गर्दै आएको नेपाली सेनाको पश्चिम पृतनालयका पृतनापति उपरथि दिपककुमार बानियाँले भन्नुभयो, ‘‘समाचार माध्यममा आएका तथ्य सबै सही छैनन्, आइतबार राती ९ बजेसम्म खोँचबाट निकालेर ६३ वटा शव अस्पताल लगिएको छ, तीनवटा शव सेतीको खोँचमा देखिएको छ तर निकाल्न सकिएको छैन र ६ जना यात्रुको अवस्था अझै अज्ञात रहेको छ।’’
विमानको अधिकांश भाग जलेको छ । लामो प्रयासपछि आगो निभाइए पनि हालसम्म जीवित कसैको उद्धार हुन सकेको छैन।
दुर्घटना अफ्ठ्यारो ठाउँमा रहेकाले आजलाई उद्धार कार्य स्थगित गरिएको छ र सोमबार बिहान ७ बजेबाट पुनः उद्धार कार्य जारी रहने जानकारी पनि पृतनापति बानियाले दिनुभयो।
उता अस्पतालमा पुराइएका शवको पोस्मार्टम गर्ने कार्य जारी छ। यो समाचार तयार पार्दासम्म २५ वटा शवको पहिचान भएको छ। पहिचान भएका शव सोमबार बिहान ९ बजेबाट परिवारलाई दिने तयारी छ।
विमानमा जडान गरिएको ब्ल्याकबक्स अझसम्म पनि भेटिएको छैन।
Discussion about this post