नेपाली ख्रीष्टियनहरूको हितमा कार्यरत संस्थाहरू नेपाल राष्ट्रिय मण्डली संगति (NCFN) र नेपाल ख्रीष्टियन समाज (NCS) को संयुक्त टोलीले आज गृहमन्त्री रामबहादुर थापालाई भेटी हालै देशभरका बिभिन्न चर्चहरूमाथि भएका आक्रमणहरूका बारेमा ध्यानाकर्षण गराएको छ । NCFN अध्यक्ष सूर्य बहादुर तामाङ “हनोक” र NCS अध्यक्ष कृष्ण बहादुर श्रेष्ठ “बर्णवास” को संयुक्त नेतृत्वमा गएको टोलीमा NCS उपाध्यक्षहरू कुबेर गुरुङ र चन्द्र श्रेष्ठ, NCS सचिव मुकुन्द शर्मा, NCS केन्द्रिय सदस्यहरू बिपी खनाल र जगदीश पोखरेल तथा NCFN केन्द्रिय कोषाध्यक्ष बिश्वदेव खड्का र NCFN प्रतिनिधि लाजरस तामाङ हुनुहुन्थ्यो ।
दुवै संस्थाका अध्यक्षहरूले हस्ताक्षर गर्नुभएको ध्यानाकर्षण पत्रलाई NCS सचिव मुकुन्द शर्माले पढेर सुनाउनुभएको थियो । यही बैशाख २२ गते बाँकेको नेपालगन्जमा रहेको क्याथोलिक चर्चमाथि आगजनी गरिएको, त्यसैगरी बैशाख २७ गते पाँचथर जिल्लाको हिलीहाङ, बैशाख २८ गते डोटी जिल्लाको बुडर गाउँ र कञ्चनपुर जिल्लाको कृष्णपुर नगरपालिकामा रहेका चर्च भवनहरूमा रातको समयमा प्रायः एकै प्रकारले आगजनी गरिएको र बैशाख २९ गते कैलाली जिल्लाको धनगढी उपमहानगरपालिका वडा नं. ४ स्थित तारानगरमा रहेको चर्च भवनमा प्रेसरकुकर बम बिस्फोट गराइएको लगायत विषयलाई ध्यानाकर्षण पत्रमा समेटिएको थियो ।
NCFN अध्यक्ष तामाङले राज्यले ख्रीष्टियनहरूमाथि कुनै प्रकारको विभेद गर्न नहुनेतर्फ ध्यान दिन गृहमन्त्रीलाई आग्रह गर्नुभयो । यसका साथै NCS उपाध्यक्ष कुबेर गुरुङले तेह्रथुममा थुनामा परेर मुद्दा खेप्दै गरेका ख्रीष्टियनहरू निर्दोष भएको भन्दै उनीहरूमाथि राज्यले न्याय गर्नुपर्ने माग राख्नुभयो । उहाँले ख्रीष्टियनहरूले जे गरे पनि जबर्जस्ति धर्मप्रचार गरेको भनेर चित्रण गर्न नहुनेतर्फ गृहमन्त्रीको ध्यानाकर्षण गराउनुभयो ।
अन्तमा, ध्यानाकर्षण पत्र बुझ्दै गृहमन्त्री थापाले धर्मनिरपेक्ष राज्यले कुनै पनि धर्मलाई काखा र पाखा नगर्ने बताउनुभयो । उहाँले बिराटनगर गोलीकाण्डका बारेमा उल्लेख गर्दै यदि राज्य ख्रीष्टियनहरूको विरुद्धमा भएको भए गोली लागेको भोलिपल्टै थुप्रै ख्रीष्टियन धर्मावलम्बीहरूलाई पक्राउ गरेर दु:ख दिन सक्ने भन्दै आफूहरूले त्यसो नगरेर राज्य न्याय र सत्यको पक्षमा रहेको प्रमाणित गरेको बताउनुभयो । बिराटनगर घटनालाई सरकारले सुक्ष्म अध्ययन गरेको र देशमा सामाजिक सद्भाव भाँड्नका निम्ति भएका प्रयासहरूलाई सरकारले राम्ररी चिनेको थापाले बताउनुभयो । उहाँले सरकार त्यस्ता प्रयासहरूलाई चिर्न सक्षम रहेको पनि स्मरण गराउनुभयो ।
यसका साथै उहाँले जबर्जस्ति वा प्रलोभनमा पारिएको बाहेक अरू अवस्थामा सबैका सबै धार्मिक क्रियाकलापहरू सरकार र कानुनको नजरमा जायज भएको बताउनुभयो । उहाँले नेपाल सरकारले चर्चमाथि आक्रमण भएका घटनाहरूको छानबिन गर्दै दोषीउपर कारबाही गर्ने तथा आउने दिनमा यस्ता घटना घट्न नदिनेतर्फ सरकार सचेत रहने प्रतिवद्धता व्यक्त गर्नुभयो ।
Discussion about this post