धन्यवाद विज्ञप्ति
लोकतान्त्रिक देश भनेर संसारले चिनेको नेपालमा ४ सय वर्षभन्दा लामो इतिहास बोकेको ख्रीष्टियान समुदायले बेलाबखतमा अनेक उतारचढाव भोग्दै आएको छ । आफुमाथिका तिरस्कार र अबहेलानालाई बेवास्ता गर्दै समृद्ध र सुसंस्कृत समाज निर्माणका निम्ति अनवरत रूपमा नेपाली ख्रीष्टियानहरू खट्दै आएको कुरा घामजत्तिकै छर्लंग छ ।
राष्ट्रनिर्माणको लागि पसिना बगाएको समुदायलाई राज्यले सम्मान गर्नुपर्नेमा उल्टै विगत १० वर्षदेखि ख्रीष्टियान समुदायको उत्सव ख्रीष्टमसमा दिने गरिएको सार्वजानिक विदा अघिल्लो सरकारले खोस्ने निर्णय गरेको थियो । निसन्देह, त्यो एउटा अदुरदर्शी र अपरिपक्व निर्णय थियो ।
ख्रीष्टमसको सार्वजानिक विदा फिर्ता हुनुपर्छ भनेर नेपाल ख्रीष्टियान समाजका साथै अन्य ख्रीष्टियान संघसंगठनहरूले निरन्तर पहल गरेका थिए ।
यो कुरा भन्दै गर्दा नेपाल ख्रीष्टियान समाज निकै हर्षित छ कि सम्पूर्ण मण्डलीहरूको प्रार्थनाको चित्कार स्वर्गका परमेश्वरले सुनेर जवाफ दिनुभएको छ । हामी हाम्रा परमेश्वरलाई यो उदेकको कामको निम्ति धन्यवाद चढाउँदछौं । नेपाल सरकार गृह मन्त्रालयले ख्रीष्टमसको दिन (डिसेम्बर २५) मा सार्वजानिक विदा दिने निर्णय गरेको छ । यसरी नेपालका ख्रीष्टियानहरूले आफु एउटा लोकतान्त्रिक राष्ट्रको नागरिक भएको अनुभव गर्न पाएका छन् ।
अघिल्लो सरकारले खोसेको ख्रीष्टमसको सार्वजानिक विदा फिर्ता गरेर लाखौँ जनताहरूको आस्थाको सम्मान गरेका निम्ति नेपाल सरकारका सम्माननीय प्रधानमन्त्री पुष्पकमल दाहाल “प्रचण्ड”, माननीय गृहमन्त्री बिमलेन्द्र निधि र सम्बन्धित सबैलाई नेपाल ख्रीष्टियान समाज हार्दिक धन्यवाद ज्ञापन गर्दछ । साथै विदा प्राप्तिको पछिल्ला अभियानहरूमा हामीलाई साथ् दिनुहुने बिभिन्न राजनीतिकर्मीहरू, मानवअधिकारकर्मीहरू, संचारकर्मीहरू अनि प्रार्थनामा निरन्तर उचाल्नुहुने सम्पूर्ण मण्डलीहरू र ख्रीष्टियान संघसंगठनहरूलाई पनि नेपाल ख्रीष्टियान समाज हार्दिक धन्यवाद ज्ञापन गर्दछ ।
परमेश्वरले यहाँहरू सबैलाई प्रशस्त आशिष दिनुभएको होस् ।
नेपाल ख्रीष्टियान समाज, केन्द्रिय समिति
Discussion about this post