बिहानै गर्नुपर्ने पहिलो काम (१)

बुधवार, अक्टोबर १२, असोज २६
‘उहाँले मलाई बिहानैपिच्छे जगाउनुहुन्छ र उहाँको इच्छा सिक्न मेरो समझ खोलिदिनुहुन्छ ।’ —यशैया ५०:४

परमेश्वरको वचनबाट यहाँ एउटा उत्तम प्रतिज्ञा छः ‘थाकेकोलाई सम्हाल्ने वचन जान्न सकूँ भनेर परमप्रभु परमेश्वरले मलाई सिकाइको बोली दिनुभएको छ । उहाँले मलाई बिहानैपिच्छे जगाउनुहुन्छ । सिक्नेलाईझैँ ध्यानसित सुन्न उहाँले समझ खोलिदिनुहुन्छ । परमप्रभु परमेश्वरले मेरो कान खोलिदिनुभएको छ, र म बागी भइनँ । म पछि हटिनँ’ (पद ४–५) ।

यशैयाले भने कि परमेश्वरले उनलाई हरेक बिहान उठाउनुहुन्थ्यो अनि त्यो दिन उनले के गर्नुपर्ने हो र अरूलाई के बताउनुपर्ने हो सो उनलाई बताउनुहुन्थ्यो ! यो ‘एक पटक मात्र हुने’ वा अद्वितीय घटना थिएन । यो त ‘बिहानपिच्छै’ हुने कुरा थियो । तपाईं ओछ्यानबाट बाहिर निस्कनुअघि परमेश्वरबाट सुन्न तपाईंले समय निकाल्नुभयो भने तपाईंको जीवन कति फरक तरिकाले बित्योहोला, कल्पना गर्न सक्नुहुन्छ ? ‘समझ’ भन्ने शब्दमा ध्यान दिनुहोस् । तपाईं कुनै परिस्थितिमा पर्नुभन्दा पहिल्यै तपाईंले के भन्नुपर्ने हो र गर्नुपर्ने हो भन्ने बारेमा परमेश्वरले तपाईंलाई समझ दिन सक्नुहुन्छ । उहाँले भन्नुभयो, ‘म परमप्रभु … हुँ, जसले तेरो भलाइको निम्ति तँलाई सिकाउँछ, जसले तँ जानुपर्ने बाटोमा तँलाई डो¥याउँछ’ (यशैया ४८:१७) ।

जीवनमा थप सहायता र प्रतिस्पर्धामा अगाडि बढ्न लाभ पाउने बारेमा विचार गर्नुहोस् त ! अनि सबैभन्दा उत्तम कुरा त यहाँ छः तपाईंले सुनिरहनुभएको छैन, वा आत्मिक रूपमा तपाईं सही स्थानमा हुनुहुन्न, वा यस क्षेत्रमा तपाईंको धेरै अनुभव छैन भने तापनि, परमेश्वरले ‘बिहानैपिच्छे’ तपाईंसँग काम गर्नुहुनेछ जबसम्म तपाईंले उहाँको स्वर चिन्न र प्रतिउत्तर जनाउन सिक्नुहुन्न । के तपाईंलाई अचम्म लाग्यो ? अचम्म नमान्नुहोस् ! आखिर, आफ्ना सन्तानहरू वृद्धि भएको, परिपक्व भएको र जीवनका उत्तम कुराहरू उपभोग गरेको चाहने असल आमाबुवाहरूले पनि त उनीहरूसँग यस्तै गर्छन् ।
आत्मिक भोजनः योम किपर लेवी १६, लेवी २३:२६–३२, हिब्रू ९:१–१४, हिब्रू १३:११–१६