परमेश्वरको ताड़ना ग्रहण गर्नुहोस्

शनिवार, अक्टोबर ८, असोज २२
‘म … हप्काउँछु र ताड़ना दिन्छु ।’ —प्रकाश ३:१९

हामी विनम्र हुनु आवश्यक परेको रूपमा परमेश्वरको ताडनाले हामीलाई विनम्र तुल्याउँछ । उहाँले त्यसो गर्नुहुँदा, हामीसँग तीन वटा विकल्पहरू हुन्छन्ः
१) उहाँको विरुद्धमा विद्रोह गर्नु ।
२) आफ्नो कुरा पुष्टि गर्न खोज्नु र बहाना बनाउनु ।
३) उहाँको ताडनालाई ग्रहण गर्नु र सही मार्गमा फर्कनु । तर परमेश्वरले तपाईंलाई विनाशर्त प्रेम गर्नुहुन्छ र तपाईं जस्तो हुनुहुन्छ त्यस्तै रूपमा तपाईंलाई प्रेम गर्नुहुन्छ भन्ने कुरा स्वीकार नगर्नुभएसम्म दीर्घकालीन परिवर्तन सुरु समेत हुन सक्दैन । त्योविना, उहाँको प्रेम र स्वीकार आर्जन गर्ने व्यर्थको प्रयासमा तपाईंले आफैँलाई परिवर्तन गर्न कोसिस गरिरहनुहुनेछ । सत्य के हो भने, तपाईंले पहिल्यै त्यो प्राप्त गरिसक्नुभएको छ— तपाईंलाई त्यो थाहा नभएको मात्र हो ! हामीमध्ये धेरै जसोले सोच्छौं कि आफूलाई स्वीकार गर्दा, हामीले आफ्ना सबै गल्तीहरूलाई पनि माफ गरेका हुन्छौं । कुरा त्यसो होइन ! उहाँले तपाईंलाई कति धेरै प्रेम गर्नुहुन्छ भन्ने कुराको बारेमा स्पष्ट बुुझाइ नभएसम्म तपाईंले परमेश्वरको ताडनालाई ठिक तरिकाले ग्रहण गर्न सक्नुहुन्न । त्यस्तो बुझाइविना तपाईंले उहाँको ताडनालाई इन्कारको रूपमा अनि तपाईंको व्यवहारप्रति उहाँको अस्वीकृतिलाई तपाईंप्रतिको अस्वीकृतिको रूपमा अथ्र्याउनुहुनेछ । आत्मिक रूपमा वृद्धि हुन तपाईंले परमेश्वर तपाईंप्रति प्रतिबद्ध हुनुहुन्छ भन्ने कुरा विश्वास गर्नुपर्छ, विशेष्गरी उहाँले तपाईंलाई सुधार गर्ने तरिकाले व्यवहार गर्नुहुँदा र तपाईंले नबुझ्नुभएका मार्गमा तपाईंलाई अगुवाइ गर्नुहुँदा । कुनै पनि कुराले आफूलाई परमेश्वरको प्रेमबाट अलग गर्नसक्दैन भन्ने कुरामा प्रेरित पावल विश्वस्त थिए (हेर्नुहोस् रोमी ८:३९) । प्रकाश तीन अध्यायमा परमेश्वरले हामी प्रत्येकलाई यसो भनिरहनुभएको छ, ‘जत्तिलाई म (प्रेमसाथ) माया गर्छु, म तिनीहरूका दोष देखाइदिन्छु … तिनीहरूलाई हप्काउँछु र ताड़ना दिन्छु ।’ परमेश्वरको प्रेम र स्वीकृतिको सबैभन्दा ठूला प्रमाणहरूमध्ये एउटा चाहिँ उहाँको ताडना हो । वास्तवमा, तपाईंले ताड़ना नपाउनु चाहिँ चिन्ताको विषय हो ! यसकारण, यदि अहिले परमेश्वरले तपाईंलाई ताड़ना दिइरहनुभएको छ भने, उत्साहित हुनुहोस् र आनन्दित हुनुहोस् ! यसको अर्थ उहाँले तपाईंको निम्ति असल कुराहरू राख्नुभएको छ ।
आत्मिक भोजनः प्रस्थान १९–२१, यूहन्ना ३:२२–३६, भजन ८९:१–१४, हितोपदेश २६:१७–१९