परीक्षामाथि विजयी हुनु (४)

मंगलवार, अगस्ट ३०, भदौ १४
‘त्यस रूखको फल खानलाई असल थियो … यसकारण तिनले त्यो खाइन् ।’ —उत्पत्ति ३:६

धर्मशास्त्रमा पहिलो पटक कसैको परीक्षा भएको घटना हेरौं, अनि त्यसबाट हामीले के सिक्न सक्छौं विचार गरौं। बाइबलले बताउँछ, ‘परमप्रभु परमेश्वरले सृष्टि गर्नुभएका (वन्य) पशुहरूमध्ये सर्प सबैभन्दा धूर्त थियो … त्यसले ती स्त्रीलाई भन्यो, “के परमेश्वरले साँच्चै …. भन्नुभएको छ ?” (पद १) ।
सर्वप्रथम, शैतानले तपाईंलाई परमेश्वरले तपाईंको निम्ति राखिदिनुभएका सबै असल थोकहरूप्रति अन्धा बनाउँछ । त्यसपछि त्यसले भावना परिवर्तन गर्ने चिजहरू जस्तै लागु पदार्थ वा मादक पदार्थ, वा कसैको पति वा पत्नी, वा इन्टरनेटमा पाइने अश्लील सामग्री लिन्छ, र त्यस्तो कुराले तपाईंलाई हानी गर्दैन भनी बताउँछ। त्यस्ता कुरा नचाख्नुहोस् ! त्यो झूटो हो ! त्यसको कुरा पत्यार नगर्नुहोस् ! ‘तर हरेक मानिस आफ्नै खराब इच्छाद्वारा लोभिएर परीक्षामा पर्दछ। तब खराब इच्छाले गर्भधारण गरेपछि त्यसले पाप जन्माउँछ। अनि पाप पूरै बढ़ेपछि त्यसले मृत्यु ल्याउँछ। मेरा प्यारा भाइ हो, धोखामा नपर’(याकूब १:१४–१६)।
निरन्तर आनन्द गरिने, छुट दिइने, इन्कार गरिने, वा लुकाइने कुनै पनि कमजोरीले तपाईंलाई दास बनाउन सक्छ। तपाईंको कमजोरीको पहिचान गर्न र त्यसलाई आक्रमणको निसाना बनाउन सकिएन भने त्यो कमजोरी बलियो हुँदै जान्छ। तपाईंका कमजोरीका क्षेत्रहरूलाई वेवास्ता गर्नुभयो भने पराजय निश्चित हुन्छ। शैतानले कतिपय व्यक्तिहरूलाई तपाईंको कमजोरी बढाउन खटाएको छ। चनाखो हुनुहोस्। तपाईंको कमजोरी कुनै पनि मित्रतातर्फ खिँचिनेछ जसले त्यसलाई स्वीकार गर्छ, त्यसमा आनन्द गर्छ र त्यसमै जिउँछ। यसको आफ्नै उद्देश्य छ— तपाईंको जीवन नियन्त्रणमा लिनु र तपाईंको निम्ति परमेश्वरको योजनालाई नष्ट गर्नु। यसले तपाईंलाई जहिल्यै पनि गलत मानिसहरूसँग घनिष्ठ सम्बन्धमा ल्याउँछ, अनि सही मानिसहरूको उपस्थितिमा तपाईंलाई अप्ठ्यारो महसुस गराउँछ। अनि यो कुनै पनि समय देखापर्न सक्छ, तपाईंका जीवनका पछिल्ला वर्षहरूमा समेत। त्यसोभए तपाईंले आफ्ना कमजोरीहरूमाथि कसरी विजय पाउनुहुन्छ त ?
इच्छाशक्तिद्वारा? होइन, परमेश्वरको शक्तिद्वारा ! अनि आज यो तपाईंको निम्ति उपलब्ध छ— यसकारण यो प्राप्त गर्नुहोस् !
आत्मिक भोजनः यहोशू १–४, मर्कूस १०:१–१२, भजन १०३:१:१२, हितोपदेश २२:२७–२९