परीक्षामाथि विजयी हुनु (३)

सोमवार, अगस्ट २९, भदौ १३
‘उनी भागे, र घरबाट बाहिर निस्के ।’ —उत्पत्ति ३९:१२

बाइबलले बताउँछ, ‘योसेफ सुन्दर र हेर्नमा राम्रा थिए, र पोतिफरकी पत्नीले योसेफमाथि नजर लगाएर भनिन्, “मसँग सुत् ।” तर तिनले अस्वीकार गरेर आफ्ना मालिककी पत्नीलाई भने, “हेर्नुहोस्, म यस घरमा भएकोले गर्दा मेरा मालिकलाई यस घरमा भएको कुनै पनि कुराको फिक्री छैन, र उहाँसँग भएका सबै कुरा उहाँले मेरै जिम्मामा दिनुभएको छ। यस घरमा मभन्दा ठूलो कोही छैन। उहाँले तपाईंबाहेक सबै कुरा मलाई दिनुभएको छ, किनभने तपाईं उहाँकी पत्नी हुनुहुन्छ। तब कसरी यस्तो घोर दुष्ट काम गरेर परमेश्वरको विरुद्धमा मैले पाप गर्नु?” अनि तिनले दिनदिनै योसेफसँग कुरा गरे तापनि तिनीसित सुत्न अथवा तिनीसित बस्न योसेफ मानेन्। एक दिन योसेफ आफ्नो काम गर्न घरभित्र गएका थिए। घरमा अरू कोही काम गर्ने मानिस थिएन। तिनले योसेफको लुगा समातेर भनिन्, “मसित सुत् ।”तर आफ्नो लुगा तिनकै हातमा छोडेर योसेफ भागे, र घरबाट बाहिर निस्के (पद ६–१२)। यी शब्दहरूमा ध्यान दिनुहोस्, ‘अनि तिनले दिनदिनै योसेफसँग कुरा गरिन् ।’एउटा निश्चित व्यक्तिको वरिपरि रहुन्जेल योसेफमाथि परीक्षा आइरह्योः पोतिफरकी पत्नी। अनि उनी एउटा निश्चित ठाउँमा हुन्जेल यो आइरह्योः पोतिफरको घर। यसकारण उनी त्यहाँबाट भागे। उनी कमजोर भएको कारण होइन, बरु उनी बुद्धिमान भएको कारण ! परीक्षासँग धेरै समय बिताउनु भनेको आगोसँग खेल्नु र ‘जल्न आफैँलाई तयार पार्नु जस्तै हो भन्ने कुरा उनले बुझेका थिए। यसकारण, तपाईंले कुन मानिसहरू र ठाउँहरूबाट बच्नु आवश्यक छ त ? विजयी जीवन जिउन तपाईंले परीक्षाका कस्ता स्रोतहरूलाई आफ्नो जीवनबाट हटाउनु जरुरी छ ? एउटा गीतले यसो भन्छः ‘तिनीहरूलाई कहिले समात्ने, कहिले थन्क्याउने; कहिले फर्कने र कहिले तर्कने भनी तपाईंले थाहा पाउनुपर्छ ।’ यसरी भाग्नुहुँदा परमेश्वरको अनादर हुँदैन— बरु भाग्नुभएन भनेचाहिँ तपाईंको अपमान हुन्छ !
आत्मिक भोजनः ३ यूहन्ना र यहूदा, मर्कूस ९:३८–५०, भजन ८४, हितोपदेश २२:२४–२६