तपाईंको आलोचना गरिँदा

शुक्रवार, अगस्ट १२, साउन २८
‘तिनीहरूले उहाँलाई अपमान गर्दा उहाँले साटो फेर्नुभएन ।’ —१ पत्रुस २:२३

रचनात्मक आलोचनाको कुरा आउँदा, यसबाट सिक्न र अझ बुद्धिमान हुन प्रयत्न गर्नुहोस् । निराधार आलोचना भयो भने, आफैँलाई याद गराउनुहोस् कि येशूलाई पनि आलोचना गरिएको थियो, यसकारण तपाईं असल मित्रको साथमा हुनुहुन्छ । अनि तपाईं घृणा गरेर बदलामा आक्रमण गर्ने परीक्षामा पर्नुभयो भने, धर्मशास्त्रको यो खण्ड पढ्नुहोस्ः ‘तिमीहरूले असल गरेर पनि धैर्यसँग सहन्छौ भने, यो परमेश्वरमा ग्रहणयोग्य हुन्छ, किनकि यसैको निम्ति तिमीहरू बोलाइएका हौ । ख्रीष्टले पनि तिमीहरूका निम्ति कष्ट भोग्नुभयो, अनि तिमीहरूका लागि एउटा उदाहरण छोडिजानुभयो, र तिमीहरू उहाँकै पाइलामा हिँड्नुपर्छ । उहाँले कुनै पाप गर्नुभएन, र उहाँको मुखमा कुनै छलको कुरा पाइएन । तिनीहरूले उहाँलाई अपमान गर्दा उहाँले साटो फेर्नुभएन । दुःख भोग्नुहुँदा उहाँले धम्की दिनुभएन । तर उचित न्याय गर्नुहुनेमाथि उहाँले भरोसा राख्नुभयो’ (पद २०–२३) । अब्राहाम लिंकनको बारेमा एउटा यस्तो रोचक कथा छ । अमेरिकी गृह युद्धको क्रममा उनले सेनाका कतिपय टुकडीलाई स्थानान्तरण गर्ने आदेशमा हस्ताक्षर गरेका थिए, तर युद्ध सचिव एड्विन स्ट्यान्टनले राष्ट्रपतिलाई मूर्ख भन्दै त्यो आज्ञा पालन गर्न इन्कार गरे । त्यो कुरा सुनेपछि लिंकनले जवाफ दिए, ‘स्ट्यान्टनले मलाई मूर्ख भनेका हुन् भने म पक्कै मूर्ख हुनुपर्छ, किनभने धेरैजसो उनी सही हुन्छन्, र उनले जे सोच्छन् त्यही भन्छन् । म यो विषयमा फेरि विचार गर्नेछु ।’ उनले त्यसैगरे, र त्यो आदेश गलत थियो भन्ने कुरा स्ट्यान्टनले उनलाई बुझाएपछि, लिंकनले चुपचाप त्यो आदेश फिर्ता लिए । लिंकनको महानताको पछाडि सानो मन र अहंकारभन्दा माथि उठ्न सक्ने अनि अरू मानिसहरूको विचारप्रति सम्वेदनशील बन्न सक्ने उनको क्षमताको हात थियो । उनले त्यत्ति सजिलै चित्त दुःखाउँदैनथे । उनले आलोचनालाई स्वागत गर्थे, अनि त्यसो गरिरहँदा उनले एक साँच्चै महान् व्यक्तिको एउटा सबलता प्रदर्शन गरेः नम्रता । यसकारण, के तपाईं आलोचित हुनभएको छ ? यसलाई एउटा गुमाउने होइन सिक्ने अवसर बनाउनुहोस् ।
आत्मिक भोजनः १ इतिहास १९:१–२३:२०, मर्कूस ५:३१–४३, भजन ११९:५७–६४, हितोपदेश २१:७–९