परमेश्वरसँग एउटा दर्शन माग्नुहोस्

बुधवार, जुलाई १३, असार २९
‘हाम्रो विश्वास सुरु गर्नुहुने र पूरा गर्नुहुने येशूलाई हेरौँ।’ —हिब्रू १२:२

दर्शन चाहिँ ‘जे छ’ भन्दा पनि के ‘हुन सक्छ’ भन्ने कुराकोे तस्विर हो। अफ्रिकाको लागि अल्बर्ट स्वेट्सरको दर्शनझैँ तपाईंको दर्शन रोग–बिमार भएको ठाउँमा स्वास्थ्य ल्याउने हुनसक्छ। अथवा जहाँ अज्ञानता छ त्यहाँ शिक्षा पुर्‍याउने हुनसक्छ — गिल्बर्ट टेनेन्टलाई प्रिन्सटन विश्वविद्यालय स्थापना गर्न सहायता गर्न प्रेरित गर्ने दर्शनजस्तै। अत्याचार भएको ठाउँमा स्वतन्त्रता ल्याउने दर्शन हुनसक्छ— विलियम विल्बरफोर्सलाई आरामदायी जीवन छोडेर दासप्रथा अन्त्य गर्न प्रेरित गर्ने दर्शन जस्तै। हाम्रो दर्शन यी दर्शनभन्दा सानो वा साधारण हुनसक्छ— जस्तै विश्वविद्यालय स्तरको अध्ययन पूरा गर्ने आफ्नो परिवारको पहिलो सदस्य बन्ने, वा तपाईंको आफ्नै आमाबुबा नभए तापनि आफ्नो सन्तानको लागि असल आमाबुबा बन्ने। अथवा कुनै कुलतले तपाईंलाई नष्ट गर्नुअघि त्यसबाट छुटकारा पाउने…वा प्रविधि बारेको आफ्नो डरमाथि विजय प्राप्त गरेर आइप्याड चलाउन सिक्ने…वा आफ्नो अवकाशको जीवन घुम्ने कुर्सीमा बसेर मृत्यु पर्खिबस्दै बिताउनुको सट्टा आफ्नो वरिपरिको संसारलाई प्रभाव पार्दै त्यो समय बिताउने तपाईंको दर्शन हुनसक्छ।
अमेरिकी लेखक तथा दार्शनिक हेनरी डेविड थोरोले भनेका छन्, ‘यदि तपाईंले हावामा महल बनाउनु हुन्छ भने…त्यसको मुनि जग पनि बनाउनुहोस्।’ तर दर्शन पाउनु मात्र पर्याप्त छैन; त्यसमा काम गर्ने प्रतिबद्धता पनि हुनुपर्छ। त्यसलाई मिसन वा लक्ष्य भनिन्छ— अनि यसका लागि यो प्राप्त गर्नका लागि विशिष्ट, मापनयोग्य कदमहरू निर्धारण गर्नु पर्छ। यी कदमहरूलाई उद्देश्य भनिन्छ जसले तपाईंको लक्ष्य प्राप्त गर्न एउटा योजना बनाउँछन् र यसरी तपाईंको दर्शन पूरा गर्न सहायता गर्छन्। सामान्यतया तपाईंसँग एउटा दर्शन हुन्छ, तर उद्देश्य धेरै हुन सक्छन्। अनि तपाईंले पूरा गर्नुहुने प्रत्येक उद्देश्य तपाईंलाई आफ्नो दर्शन पूरा गर्ने दिशातर्फ एक कदम नजिक ल्याउँछन्।
वास्तवमै शुभ खबर यहाँ छः तपाईंको दर्शन परमेश्वरबाट आउँछ भने उहाँले त्यसलाई पूरा गर्न आवश्यक पर्ने सामथ्र्य, बुद्धि, सम्पर्क, सम्बन्ध, र स्रोत–साधनहरू तपाईंलाई जुटाइदिनुहुनेछ। कारण, उहाँ ‘हाम्रो विश्वास सुरु गर्नुहुने र पूरा गर्नुहुने’ व्यक्ति हुनुहुन्छ।
आत्मिक भोजनः २ शमूएल ७: १८–११:२७, मत्ती २६: ३६–४६, भजन ११८: १०–१८, हितोपदेश १८:७–९