काठमाडौँ । १ असार, राष्ट्रिय ख्रीष्टिय महासंघ नेपालद्वारा गृहमन्त्री माननिय शक्ति बहादुर बस्नेतलाई भेटेर रिहाइको माग गर्दै ज्ञापन पत्र बुझाएको छ। सोहि क्रममा गृहमन्त्री शक्तिबहादुर बस्नेतले नेपालको संविधानअनुसार सबै नेपालीलाई आफ्नो धर्म र संस्कृति मान्ने अधिकार भएको बताउनुभएको छ । गृह मन्त्रालयमा ज्ञापनपत्र बुझ्दै मन्त्री बस्नेतले संविधानले कुनै पनि जातजाति, भाषाभाषी, धर्म संस्कृतिलाई विभेद नगरेको अवगत समेत गराउनुभएको छ।
महासङ्घले गत जेठ २७ गते चरिकोटस्थित विद्यालयमा भूकम्पसम्बन्धी सचेतना कार्यक्रम गर्ने क्रममा धर्म प्रचारको अभियोगमा ख्रीष्टियन समुदायका आठ जना व्यक्तिलाई प्रहरीले पक्राउ गरेको जानकारी गराउँदै उनीहरुको रिहाइको माग गरेको थियो।
सबैलाई स्वतन्त्रतापूर्वक आ–आफ्नो धर्म र संस्कृति मान्न पाउने र वकालत गर्ने अधिकार भए पनि त्यसका लागि समय, स्थान र सन्दर्भका बारेमा ध्यान पुर्याउन आग्रह गर्दै मन्त्री बस्नेतले भन्नुभयो, “विद्यालयमा धार्मिक कार्यक्रम गर्नु उपयुक्त होइन ।” उहाँले धार्मिक विषयका घटनालाई कसैले पनि अनावश्यक रुपमा विवादमा नल्याइदिन पनि आग्रह गर्नुभयो ।
कार्यक्रममा महासङ्घका महासचिव सिबी गहतराजले ख्रीष्टियन समुदायले सबै धार्मिक समुदायलाई सम्मान गर्दै धार्मिक सद्भाव र एकता चाहेको बताउँदै भन्नुभयो, “हामी कसैको पनि धर्म जबर्जस्ती परिवर्तन गर्न चाहँदैनौँ । नागरिकले आफ्नो धर्म मान्न पाउने, छान्न पाउने र अभ्यास गर्न पाउने अधिकारलाई कसैले पनि बन्देज गर्न हुँदैन ।”
चरिकोटमा प्रहरीले धर्म प्रचार गरेको आरोपमा जेठ २७ गते विहिबारका दिन बनिता डङ्गोल, बालकृष्ण राई, फिलिप तामाङ, किरण दाहाल र भीमबहादुर तामाङलगायत चरिकोटस्थित माउन्टभ्याली बोर्डिङका प्रिन्सिपल प्रकाश प्रधान र मोर्डन नेपालका प्रिन्सिपल विमल शाहीलाई पक्राउ गरेको थियो । सोमबारका दिन पास्टर शक्ति पाख्रीन पनि पक्राउमा परेका छन्।
Discussion about this post