चरिकोट थुनामा राखिएका सातजनासँग भेट र डिएसपीसँग बैठक (अपडेट)

३१, जेठ, चरिकोटमा धर्म प्रचारको अभियोगमा थुनामा परेकाहरूलाई काठमाडौंबाट पास्टर अगुवा तथा सम्बन्धित क्षेत्रका व्यक्तिहरू र एनसिएसबाट गरी ५ जनाको समूहले भेट गरेर फर्केको छ। जेठ ३० गते आइताबारका दिन डा. महेन्द्र भट्टराई, सागर परियार, पा. देवकुमार क्षेत्री, पा. गजेन्द्र राई, देवानन्द कडरिया र पास्टर राजेन्द्र मल्लको समूह दोलखा जिल्ला प्रहरी कार्यालय गएको थियो। यो भन्दा पहिला नेपाल ख्रीष्टियन समाजको टोलि गएर आएको थियो। दोलखाको चरिकोटस्थित दुइवटा विद्यालयमा धर्म प्रचार गरेको अभियोगमा विहिवार जेठ २७ गते प्रहरीले पक्राउ गरेको थियो। थप अनुसन्धानकोलागि भनि ५ दिनको म्याद थप गरि थुनामा राखिएका ७ जनालाई एनसिएसबाट गएको टोलिले भेटेर कुराकानी गरेको छ। भेटमा सातजना व्यक्ति निकै खुसी भएको र त्यहाँको अवस्था बुझ्दा त्यति धेरै निरास नभएको कुरा डा महेन्द्र भट्टराईले जानकारी गराउनुभएको छ।
जिल्ला प्रहरी कार्यालयमा डिएसपीसँगको भेट र बैठकमा सकरात्मक कुराकानी भएको जानकारीमा आएको छ। डिएसपीसँगको बैठक लामो भएपनि सकरात्मक भएको छ। प्रमुख जिल्ला अधिकारीसँग भेट गर्ने योजना भएतापनि हुन सकेन। मुद्दा अदालतमा दर्ता भइसकेको हुँदा अदालतबाट सोधपुछ हुनेछ। ४ जनाको वयान भैसकेको छ र अब तीन जनाले बयान दिन बाँकि छ। बाँकि तीनजनाले आज ३१ गते बयान दिनेछन्। अब मुद्दा अदालतबाट हेरिने भएको हुँदा ख्रीष्‍टियनहरूले पनि वकिलद्वारा आफ्नो पक्षबाट अगाडि बढ्नुपर्ने अवस्था देखिकएको कुरा डा भट्टराईबाट जानकारी भएको छ।
त्यसैगरी जेठ ३० गतेकै दिन जनजागरण पार्टी नेपालका केन्द्रीय अध्यक्ष तथा माननीय लोकमणि ढकाल, महासचिव बि.पी.खनाल र के.का.स. सुनिल महर्जनलगायत तीन सदस्यीय टोलीले गृहमन्त्री माननीय शक्ति बस्नेतसँग भेट गरी दोलखामा हाल थुनामा राखिएका ७जना ख्रीष्टियनहरूको तत्काल निशर्त रिहाईको माग गरेको छ। गृहमन्त्रीबाट फोन गरि थुनामा राखिएकाहरूको बारेमा एक्सन लिन भन्ने उर्दी जारि भयको कुरा पार्टीबाट जानकारी भएको छ।
नेपालका चर्चहरूले निरन्तर प्रार्थना गरिराखेका छन्। अब यस्ता थप घटनाहरू नदोहरिन र ७ जनाको रिहाइको लागि एनसिएसको बैठक पनि भैरहेको छ।