जो रुँदै रुँदै बिउ बोकेर छर्न जान्छ

“जो रुँदै रुँदै बिउ बोकेर छर्न जान्छ त्यो फसलका बिटाहरु बोकेर आनन्दले गित गाउँदै फर्कने छ”–भजनसंग्रह १२६:६धरान/ विदेशी संघसंस्थाले नेपालमा ख्रिष्टियन धर्मको प्रचार गरेको र ख्रिष्टियनहरुले विदेशी डलरबिना केही गर्दैनन् भन्ने मिथ्या आरोप खेपिरहेको बेला आफ्नै खर्च योजना र व्यवस्थापनमा इसाईहरुबाट नेपालको पूर्वी क्षेत्र धरानमा विगत ५ महिनादेखि “मिशन स्कूल अफ थियोलोजीको स्थापना गरी “बेशिक बिब्लीकल थियोलोजी कोर्ष”को अध्ययन अध्यापन गरिरहेको छ । गत फागुन १५ देखि ३ महिने पहिलो समूहको कक्षा सम्पन्न भईसकेको छ भने दोस्रो समूहको तीन महिने तालिम जेठ २ गतेबाट शुरु भएको छ ।

धरान–९ पुतलीबजारमा स्कुल भवन भाडामा लिई सञ्चालन भइरहेको छ । पहिलो सत्रमा यस १४ जना सहभागी भएका थिए । धरानभित्रका स्थानीय मण्डलीमा सेवासंगती गर्ने इसाईजनहरुका लागि सो तालिम संचालित भएको हो । दोस्रो तालिममा २० जना विद्यार्थीहरु सहभागी हुनुभएको छ । हरेक दिन विहान ६ बजेदेखि ८ बजेसम्म सञ्चालन हुने सो कार्यक्रममा स्कूलका प्रिन्सिपल गिदोन लामिछानेले अपेक्षा भन्दा धेरै विद्यार्थीहरुको सहभागिताले आफूहरु उत्साहित भएको बताउनु भयो ।

सोही कार्यक्रममा तालिम अबधिभर विद्यार्थीहरुले अनुशाषित भई परमेश्वरको विषयमा गम्भिर अध्ययन गर्न र तालिमपश्चात् आ–आफ्नो मण्डलीमा सेवाकाई गर्न सुझाव दिंदै रेभ. टिएच जाङ्गा, पाष्टर शाम जी जोन, पाष्टर कमल गिरी, शिक्षक नवराज बस्नेत, राजेन्द्र दर्नाल लगायतले शुभकामना मन्तव्य व्यक्त गर्नुभएको थियो ।

तालिममा बाइबलको रुपरेखा प्रिन्सिपल गिदोन लामिछाने, नयाँ तथा पुरानो करारको सर्वेक्षण रेभ. टिएच जाङ्गा, बाइबल अध्ययन तरिका र अर्थखोलाकाई नियमहरु पाष्टर खड्गबहादुर थापा मगरले, सुसमाचार प्रचार र चेलापनको विकास पाष्टर महेन्द्र थापाले, बाइबलीय सिद्धान्त पा. शाम जी जोनले, आत्मिक जिवन र वचन प्रचार शिक्षक नवराज बस्नेतले, मण्डली इतिहास एल्डर राजकुमार राईले, मण्डली प्रशासन र विश्वासीहरुको कर्तव्य पाष्टर कमल गिरीले र ख्रिष्टियन संस्कारका विषयमा प्रिन्सिपल गिदोन लामिछानेले सिकाउनु हुने मिशन स्कूल अफ थियोलोजीले जानकारी दिएको छ । तालिममा धरानका विभिन्न मण्डलीका अगुवा तथा विश्वासीहरुले मिशन स्कूलमा नै पढ्न पाउँदा आफूहरुलाई गर्वलागेको बताए । धेरै समय खर्चेर टाढा जानुभन्दा छोटो समयमा यतिधेरै विषयमा प्रभावकारी रुपमा सिक्न पाउने भएकोले स्कूलमा भर्ना भएको विद्यार्थीहरुले बताए ।

विद्यार्थीहरुको ओइरो लाग्नेक्रम बढेकाले अब यो समूहमा थप भर्ना लिन नसकिने र आउादो समूहमा तयारी रहन स्कूलले सुझाव दिँदै नयाँ भर्ना स्थगित गरेको छ । स्कूलमा विद्यार्थी पठाउने मण्डली, प्रचार प्रसारमा सहयोग गर्ने सम्पूर्ण शुभचिन्तक, सहयोगी महानुभाव र अदृश्यमा बसेर संसारका विभिन्न कुनाबाट प्रार्थना गरिदिनु हुने सबैलाई हार्दिक धन्यवाद प्रिन्सिपल लामिछानेले दिनु भएको छ । उहाँले कुनै पनि मिशन र संस्थाबाट सहयोग नलिई विश्वासकै आधारमा स्कूल सञ्चालन गरिएको हुँदा नि:स्वार्थ भावनाले सहयोग गर्न सबैमा अनुरोध गर्नुभएको छ । कक्षा हाल निरन्तर सञ्चालन भईरहेको छ । स्मरणीय छ मिशन स्कूलमा शिक्षक तथा अन्य सहयोगीले समेत भोलेन्टियर्स रुपमा काम गरिरहनु भएको छ । स्कूलका संचालनका गर्न आर्थिक आवश्यकताको परिपुर्तिका लागि सबैमा स्कूलले सबैमा अनुरोध गरेको छ ।