बागमती प्रदेशका ३६० पत्रकारको सामूहिक दुर्घटना बिमा

हेटौँडा, असोज २० गते । सञ्चार रजिष्ट्रार कार्यालय बागमती प्रदेश हेटौँडाले प्रदेशका ३६० जना पत्रकारको सामूहिक दुर्घटना बिमा गरिदिएको छ । बिमा ऐन २०४९ को दफा ८ को उपदफा (घ२) अनुसार र बिमा समितिले बनाएको दुर्घटना बिमा निर्देशिका २०७८ बमोजिम सञ्चार रजिष्ट्रार कार्यालय बागमती प्रदेशबाट परिचयपत्र प्राप्त गरी नवीकरण गर्नुभएका ३६० जना पत्रकारको सामूहिक दुर्घटना बिमा गरिएको हो ।

प्रतिव्यक्ति सात लाख रुपियाँसम्मको सामूहिक दुर्घटना बिमा नेपाल सरकारको स्वामित्व प्राप्त राष्ट्रिय बिमा कम्पनी लिमिटेडसँग गरिएको सञ्चार रजिष्ट्रार कार्यालय बागमती प्रदेशका सञ्चार रजिष्ट्रार रेवती प्रसाद सापकोटाले जानकारी दिनुभयो ।

पहिलो चरणको यो बिमा कार्यक्रम बिमा लागूभएको मितिले ३६५ दिन कायम रहने उहाँले बताउनुभयो । सञ्चार रजिष्ट्रारको कार्यालयबाट परिचयपत्र प्राप्त गरेका तर नवीकरण गर्न बाँकी रहेका पत्रकारहरूले आफ्नो परिचयपत्र नवीकरण गरी दोस्रो चरणको बिमा कार्यक्रममा सहभागी हुन सक्नेछन् सञ्चार रजिष्ट्रार सापकोटाले जानकारी दिनुभयो ।

दुर्घटनामा परि मृत्यु भएमा बिमामार्फत उपलब्ध गराइने रकमले शववाहनदेखि किरिया खर्चगर्न सक्ने उल्लेख छ । क्रियाशील भएर काम गर्ने पत्रकारको मनोबल बढाउन, उनीहरू सुरक्षित भएर तष्टस्थ रूपमा काम गर्न सक्ने वातावरणको श्रृर्जना गर्नका लागि बिमा कार्यक्रम प्रभावकारी बन्ने सञ्चार रजिष्ट्रार सापकोटाको विश्वास छ ।पत्रकारले सुरक्षित महसुस गर्न सके मात्रै गुणस्तरीय समाचार लेख्न मद्दत पुग्छ, आगामी दिनमा सामाजिक सुरक्षामा लैजाने योजना पनि बनाइरहेका छौँ, सञ्चार रजिष्ट्रार सापकोटाले भन्नुभयो ।

उहाँले सम्बन्धित पत्रकार, सञ्चार माध्यम र सरकारको सहभागितामा २५/२५ र सरकारको तर्फबाट ५० प्रतिशत रकम व्यहोर्नेगरी सामाजिक सुरक्षा कोषमा आबद्ध हुनेगरी योजना बनाउँदै गरेको र पत्रकारको संस्थागत विकास र सुरक्षामा यस्ता कार्यक्रमले थप ऊर्जा थप्नमद्दत पुग्ने बताउनुभयो ।

बागमती प्रदेश सरकारले प्रदेश सञ्चार माध्यम ऐन २०७५ बनाएपछि ऐनमार्फत प्रदेशमा रजिष्ट्रार नियुक्त गरिएको थियो । देश सङ्घीय संरचनामा गएपछि प्रादेशिक तहबाट बागमती प्रदेश सञ्चार रजिष्ट्रारको कार्यालयबाट परिचयपत्र वितरण गरिएको थियो ।

नेपाल पत्रकार महासङ्घको सिफारिसमा अघिल्लो वर्ष एकहजार ५८४ जना पत्रकारहरूको सामूहिक दुर्घटना बिमा गरिएको थियो । नेपालका ५० प्रतिशत पत्रकार र ७० प्रतिशत सञ्चार माध्यम बागमती प्रदेशको रहेको तथ्याङ्क छ । श्रोत : खबरदैनिक