यसपालिको नोबल पुरस्कार कोरोना खोपको अनुसन्धान गर्ने दुई चिकित्सकलाई

२०८० असोज १५

काठमाडौं । नोबल पुरस्कार समितिले कोभिड-१९ विरूद्धको खोपमा प्रयोग भएको प्रविधिमा अनुसन्धान गरेका दुई जना वैज्ञानिकलाई यसवर्षको चिकित्सा विज्ञानतर्फको नोबल पुरस्कार प्रदान गरेको छ ।

नोबेल पुरस्कार प्राप्त गर्ने वैज्ञानिकहरू क्याटलिन कारीको र ड्रयु वेसम्यान हुन् र यिनीहरुले ‘मेसेन्जर आरएनए’ भ्याक्सिन बनाउन गरेको खोजका लागि चिकित्सा विज्ञानतर्फको पुरस्कार दिने घोषणा भएको छ ।

सन् १९५५ मा हंगेरीको स्जोल्नोकमा जन्मिएकी कारीको अहिले हंगेरीको जेगेड युनिभर्सिटी र अमेरिकाको युनिभर्सिटी अफ पेन्सिलभेनियामा आवद्ध छिन् भने १९५९ मा अमेरिकाको लेक्जिङटनमा जन्मिएका वेसम्यान पनि अहिले युनिभर्सिटी अफ पेन्सिलभेनियामै आवद्ध छन्।

कोरोना महामारीका कारण विश्वमा झण्डै ७० लाख बढी मानिसहरूको मृत्यु भएको थियो । वैज्ञानिकहरूले कोभिडविरूद्ध विभिन्न किसिमका खोप बनाएका थिए, जसमामध्ये फाइजर, मोडेर्नाजस्ता खोपमा मेसेन्जर आरएनए प्रविधि प्रयोग गरिएको थियो ।