एसिसी प्रिमियर कप : नेपालले ओमानलाई ८४ रनले हरायो

शुक्रबार ०८ बैशाख, २०८०

एसिसी प्रिमियर कप क्रिकेटमा नेपालले लगातार दोस्रो जित निकालेको छ । पहिलो खेलमा नेपालले मलेसियाविरुद्ध ६ विकेटको जित निकालेको थियो भने आज समूह ‘ए’ मा रहेको नेपालले ओमानलाई ८४ रनले हराएको छ ।

पहिलो ब्याटिंग गरेको नेपालले आफ्नो ८ विकेट गुमाई ओमनलाई ३ सय ११ रनको लक्ष्य दिएकोमा ओमान ४६.३ ओभरमा २ सय २६ रनमै अलआउट भयो ।

ओमानलाई २२६ रनमै समेट्नेक्रममा स्पिनर सन्दीप लामिछानेले ८ ओभरमा ४५ रन दिएर महत्वपूर्ण ३ विकेट लिए । याेसँगै उनले ओडिआईमा छिटो १ सय विकेट लिने रेकर्ड बनाए । सन्दीपले ४२ खेलमा १ सय विकेट पूरा गरेका हुन् त्यस्तै, ओमानविरुद्ध करण केसीले ८.३ ओभरमा ६२ रन दिँदै ३ विकेट नै लिए । दीपेन्द्र सिंह ऐरीले दुई र ललितनारायण राजवंशीले एक विकेट हात पारे ।

ओडिआईमा नेपालले कुनै पनि टोलीलाई दिएको यो अहिलेसम्मकै विशाल योगफल थियो । यसअघि नेपालले ओडिआईमा उच्च स्कोर आइसिसी विश्वकप लिग–२ मा पपुवा न्यूगिनी (पिएनजी) विरुद्ध बनाएको थियो । अघिल्लो महिना त्रिवि मैदानमा भएको उक्त खेलमा नेपालले २ सय ९७ रन बनाएको थियो ।

ओमानलाई कीर्तिमानी लक्ष्य दिनेक्रममा युवा अलराउन्डर कुशल मल्लले विस्फोटक शतकीय इनिङ खेले । ६४ बलको सामना गरेका उनले १० छक्का र ९ चौकासहित १०८ रन बनाए । कुशलले ५९ बलमा शतक पूरा गरेका थिए ।

योसँगै उनी अब एकदिवसीयमा सर्वाधिक छिटो शतक बनाउने नेपाली ब्याटर बनेका छन् । यसअघि ओडिआईमा छिटो शतक बनाउने नेपाली ब्याटरको रेकर्ड कुशल भुर्तेलको नाममा थियो । उनले गत वर्ष पिएनजीविरुद्ध ९१ बलमा शतक बनाएका थिए । भुर्तेलको रेकर्ड अब मल्लले तोडेका छन् ।

अन्तर्राष्ट्रिय क्रिकेट करियरमा उनको यो पहिलो शतक हो । त्यस्तै, ओमानविरुद्ध अर्का अलराउन्डर सोमपाल कामीले अर्धशतकीय पारी खेले । ४८ बल खेलेका उनले ९ चौकाको मद्दतमा अविजित ६३ रन बनाए । एकदिवसीयमा दोस्रो अर्धशतक बनाएका सोमपालको यो उच्च स्कोर हो ।

यस्तै, भीम सार्कीले ३३, आरिफ शेखले २९ र कप्तान रोहित पौडेलले २३ रन जोडे । करण केसीले १५ बलमा २ चौका र १ छक्कासहित अविजित २९ रनको योगदान   दिए । ओमानका लागि अयान खानले दुई, जतिन्दर सिंह, अकिब इलियास, जीशान मक्सूद, कलीमुल्लाह, बिलाल खान र फैयज बटले एक/एक विकेट लिए ।