राष्ट्रिय भेला २०६९

काठमाडौं –  नयाँ नेपाल निर्माणमा ख्रीष्टियन प्रतिबद्धताको राष्ट्रिय भेला २०६९ चैत २१ गतेका दिन सभा गृह काठमाडौंमा भएको छ। राष्ट्रिय सभामा नेपालका विभिन्न जिल्लाका चर्चहरूबाट पास्टर अगुवाहरूको उपस्थित रहेको थियो। राष्ट्रिय सभाका अतिथि चुनावी सरकारका अर्थ, बाणिज्य र उद्योग मन्त्री शंकरप्रसाद कोइराला हुनुहुन्थ्यो। राष्ट्रिय भेलालाई नेपाल टेलिभिजन र एभिन्यूज च्यानलबाट प्रत्यक्ष प्रसारण गरिएको थियो।

डा.मंगलमान महर्जनको प्रार्थनाले राष्ट्रिय भेला २०६९औपचारिकरुपमा सुरू भएको थियो। डा.सिमोन पाण्डले भेलामा आउनुभएकाहरूलाई स्वागत गर्नुभएको थियो। पास्टर लोकमणी ढकालको संयोजकत्वमा भएको राष्ट्रिय भेलामा ढकालले नयाँ नेपाल निर्माणमा ख्रीष्टियन प्रतिबद्धताको बारेमा परिचय दिँदै विगतमा भएका जिल्ला स्तरीय कार्यक्रमहरूको प्रतिवेदन वाचन गर्नुभएको थियो। राष्ट्रिय भेलामा देशमा भएका मूख्य समस्याहरू जसले गर्दा राष्ट्र निर्माणको काममा ढिलाइ भएका सवालहरू: बेरोजगारी, भ्रष्टाचार, जातिय विभेद, अशिक्षा तथा निरिक्षरता, महिला विरुद्ध हिंसाको बारेमा छोटो समयमा निम्न वक्ताहरूले बोल्नुभएको थियो। डा.सरिता थापा, डा. तिर्थ थापा, इशुजंग कार्की, प्रकाश सुब्बा र डा.महेन्द्र भट्टराइले बोल्नुभएको थियो।

राष्ट्र निर्माणको विषयमा क्रिश्चियन धर्मावलम्बीहरूले उठाउनुभएका महत्वपूर्ण विषयलाई समर्थन गर्दै चुनावी सरकारका अर्थ, बाणिज्य र उद्योग मन्त्री शंकरप्रसाद कोइरालाले ती विषयहरूलाई आफ्नो स्थानबाट नै इमान्दारीकासाथ पूरा गरे राष्ट्र निर्माणको काम हुनेमा जोड दिनुभएको थियो। पत्रकार महासंघका अध्यक्ष शिव गाउँलेले पनि इमान्दारीका साथ आफ्नो ठाउँबाट काम गरे राष्ट्र निर्माण हुन्छ भनी जोड दिनुभएको थियो। गाउलेले नयाँ नेपाल शब्दको अपहेलना भएको कुरा पनि बताउनुभएको थियो। रिपोर्टस कल्वका अध्यक्ष ऋषि धमालाले पनि आफ्नो मनतब्य राख्नुभएको थियो। कार्यक्रमको अन्तमा नयाँ नेपाल निर्माणमा ख्रीष्टियन प्रतिबद्धताका अध्यक्ष डा.बालकृष्ण शर्माले धन्यवाद ज्ञापन र प्रार्थना गरी भेला विसर्जन भएको थियो। नयाँ नेपाल निर्माणमा ख्रीष्टियन प्रतिबद्धताको राष्ट्रिय भेला थप अरु दुइ दिन नेपाली इसाई मण्डली धोबिघाट ललितपुरमा भएको थियो। नेपालका विभिन्न जिल्‍लाहरूबाट आउनुभएका प्रतिनीधिहरूको उपस्थितिमा भेला भएको थियो।