असल छिमेकीद्वारा तीन विद्यालय हस्तान्तरण

Kamal BN
सिरानचोक, गोरखा

जेठ २८ र २९ गते गोरखाको सिरानचोक गाउँपालिका–७ श्रीनाथकोटस्थित तीनवटा विद्यालय भवन समुदायलाई हस्तान्तरण गरिएको छ । भूकम्पपछि विगत दुई वर्षदेखि टहरोमा सञ्चालित ३ विद्यालयका लागि पोखरेली ख्रीस्टियन समुदायको सामाजिक अंग असल छिमेकी नेपालले भूकम्प प्रतिरोधी भवन पुनर्निर्माण गरिदिएको हो ।

उद्घाटन तथा हस्तान्तरण कार्यक्रमका प्रमुख अतिथि सिरानचोक गाउँपालिकाका नवनिर्वाचित अध्यक्ष राजु गुरुङले स्कुलहरूको विद्यालय भवन उद्घाटन गर्दै भने— “म देशविदेश घुमेको छु । मेरा धेरै विदेशी साथीहरू छन् । नेपालमा आउने सहायता कसरी संकलन हुन्छ भन्ने कुरा मलाई थाहा छ । विदेशी दाताहरूले उनीहरू धनी भएकोले, फालाफाल भएकोले दिएका होइनन् । त्यहाँका बालबालिकाहरूले, बुढाबुढीहरूले समेत आफ्नो खाजा खर्चबाट बचाएर एकएक डलर यसमा परेको छ । यो कुरा सबैले बुझ्नुपर्दछ ।” अब नवनिर्मित संरचनाको संरक्षण गर्ने जिम्मा श्रीनाथकोटबासीको काँधमा आएको बताउँदै उनले विद्यालय सफल हुनका लागि शिक्षक, अभिभावक र व्यवस्थापन समिति जिम्मेवार भएकोमा जोड दिए।

जिल्ला शिक्षा कार्यालयका प्रतिनिधिका रुपमा जौबारी स्रोतकेन्द्रका स्रोत व्यक्ति डोलमान श्रेष्ठले असल छिमेकी नेपाललाई नामजस्तै असल काम गर्ने संस्था भनी प्रशंसा गरे । त्यस्तै पत्रकार महासंघ नेपालका अध्यक्ष किशोरजंग थापा गैससहरूको कामको चर्चा गर्दै असल छिमेकी नेपाल गैससहरूका बीचमा उदाहरणीय संस्था बन्न सफल भएकोमा बधाई दिए । कार्यक्रममा असल छिमेकी नेपालका कार्यकारी निर्देशक राजेन्द्र अधिकारीले सरकारी निकाय र स्थानीय बासिन्दाको सहयोगले नै आफूहरू तोकिएको समयमा काम गर्न सफल भएको बताए । उनले नवनिर्मित संरचनाहरूलाई आफ्नै घर सम्झेर वास्ता गरिदिन आग्रह पनि गरे ।

भूकम्पपछि राहत वितरणको काममा सक्रिय असल छिमेकी नेपाल, पोखरालाई जिल्ला दैवी प्रकोप उद्धार समितिले श्रीनाथकोटमा चारवटा विद्यालय भवन पुनःनिर्माणको जिम्मा दिएको थियो । तीमध्ये तीनवटा विद्यालय पुनःनिर्माण भइसकेको र जनकल्याण माविको १४ कोठे भवन निर्माणको काम तीव्र रुपमा अघि बढाइएको संस्थाका कार्यक्रम संयोजक विजयकुमार श्रेष्ठले जानकारी दिए । श्रेष्ठका अनुसार ७५ लाख रुपैयाँ लागतमा अर्कुल प्राविको ६ कोठे भवन, ८५ लाख रुपैयाँको लगानीमा जनजागृति प्राविको ६ कोठे भवन र ६५ लाख रुपैयाँ लागतमा चन्द्रोदय माविका ४ कोठे भवन पुनःनिर्माण भएका हुन् ।

असल छिमेकी नेपालले यसअघि श्रीनाथकोट वडा कार्यालय भवनका साथै श्रीनाथकोट, घ्याल्चोक, भुम्लिचोक, घैरुङ, आँपपीपलमा स्वास्थ्य चौकी भवन पुनःनिर्माण गरी हस्तान्तरण गरिसकेको छ । जिल्ला जनस्वास्थ्य कार्यालय गोरखाले पनुर्निर्माणमा उत्कृष्ट गैसस भनी असल छिमेकी नेपाललाई सम्मान समेत गरेको छ ।