मेरो इच्छा, मेरो खुशी, मेरो योजना कि ….?

प्रभुको चाहना हामीलाई असल राम्रो सिद्ध इच्छातिर डोर्‍याउनु नै हो । विना आशा, विना उद्देश्य उहाँका कुनै छोरी र छोरो अधमरो अवस्थामा यो संसारमा बाँच्नु पर्दैन । म राजाहरूका राजा, महान राजा मसिहाको सन्तान हुँ भन्ने विचारमा हामी विहान उठ्नुपर्छ, बेलुकी ढल्कनुपर्छ र दिनभरि तेसरी बाँच्नुपर्छ। तर हामी पनि यस संसारको ढाँचामा चल्न चाहन्छौं भने त के फरक पर्‍यो ?

“आ–आफ्ना शरीरलाई जिउँदो बलिको रूपमा अर्पण गर । यस संसारको ढाँचामा नचल तर आफ्नो मनमा नयाँ भई पूर्ण रूपले परिवर्तित होओ, र परमेश्वरका असल ग्रहणयोग्य र सिद्ध इच्छा के हो त्यो तिमीहरूले जाँच्न सक ।” रोमी १२:१,२

बाइबल किनेको, बाइबल बोकेको, बाइबल पढेको, बाइबल सुनेको के फाइदा भो ? विचारको ढाँचा, बोलीको ढाँचा, अन्धविश्वासको नकल, ज्योतिषि हेराउने, पत्याउने, हात देखाउने, राशी फलबाट फल खोज्ने ? यी सबबाट धेरै माथि उच्च स्थान, स्वर्गीय स्थानमा येशू तपाई र मलाई बोलाउनुहुन्छ । पर्खनुहुन्छ । यस संसारको ढाँचा होइन ।

“माथिका कुराहरूको खोजी गर, जहाँ ख्रीष्ट हुनुहुन्छ, माथिका कुराहरूमा मन लगाओ (कलस्सी ३:१,२)।” यो सब शरीरबाट सुरु हुन्छ । शरीरलाई जिउँदो बलिदानमा चढाउनुपर्छ ।
“बितेका कुराहरूलाई भुल, उहिलेका कुराहरूलाई विचार नगर, हेर म एउटा नयाँ कुरो गर्दैछु ….”
यशैया ४३:१८,१९ बाट प्रभुको पवित्रात्मा हामीसँग बोल्न चाहनुहुन्छ । हामीहरू बितेका परिस्थिति, पुरानो घटना, नौलो दूर्घटनामा नै वास बस्यौं, विचार र विवेकलाई तेसकै वरिपरि घुमाइरहन चाहन्छौं भने आफैलाई नोक्सानी गर्छौं । यो सब शरीरबाट सुरु हुन्छ ।

गिरेको, लडेको, तहसनहस भएकोलाई मुसार्नु र कोट्याउनु, कुरा झिक्नु र कथा बताउनु किन सजिलो छ ? किन भने त्यो हाम्रो निम्ति परिचित कुरो हो, भोगेको र जानेको, परिचित ।  तर परमप्रभु भन्नुहुन्छ, “म एउटा नयाँ कुरा गर्दैछु” । मैले छान्नुपर्छ अनि तपाईले पनि पक्का निर्णय गर्नुपर्छ, पछि फर्केर हेरौं र त्यसैमा डुबिरहूँ कि नौलो आशिष र नयाँ घुम्तितिर उहाँलाई विश्वास गरेर अघिल्तिर बढूँ । यो सब शरीरबाट सुरु हुन्छ ।

“परमप्रभुको प्रतीक्षा गर । बलिया होऊ, र तिम्रो हृदय साहसिलो होस् र परमप्रभुकै प्रतीक्षा गर । भजन २७:१४ ।”

म केको प्रतीक्षा गर्छु ? कसको प्रतीक्षा गर्छु ? कसको मेल ? एसएमएस ? मेसेज पर्खन्छु ? धर्नाढुक लाएर कुर्छु र त्यो आइपुग्दा आकाश हुँइकेर रमाउँछु, फुरुक्क हुन्छु । त्यही मेसेजले तपाई र मलाई विस्तार, विस्तार मेसेजजस्तै बनाउँछ र आइपुग्ने सन्देशजस्तै र ती प्रिय सेन्डरजस्तै बनाउँछ । उसको आत्मा र मेरो आत्मा एक हुँदैजान्छ। अरू कुनै कुरो महत्वको रहँदैन । यो सब शरीरबाट सुरु हुन्छ ।

डिजिटल युग र वर्तमान प्रविधिको देन हाम्रो जीवनमा त्यै हो । परमप्रभु कै प्रतीक्षा गर्नु ? किन? उहाँजस्तै हुनु ? कसरी ? बाइबल हेरेर, पढेर तेसमा घोत्लेर अनि खुशी बनेर । प्रभुको एसएमएस र मेसेज हेर्ने बानी बसाल्दै जाऔं है मित्र हो ।  कुन बेला उहाँको कल आउँछ हामी जान्दैनौं।

तपाईले थाहा गर्नुभएको छ ? जुन कुरो हानिकारक छ त्यो मनोरन्जनले, सुन्दर डिजाइनले सजिएको हुन्छ । ड्रमको बिट र बेस गिटारको ढुकढुकीले सघाइरहेको हुनसक्छ त्यो हानिकारकलाई । अनि त किन म तालसे ताल मिला भनेर नाँच्दिनँ । तर हानिकारक त हो नै । ड्यामेज त हुन्छ । अघि वा पछि । यो सब शरीरबाट सुरु हुन्छ ।

होशियार । त्यही मेसेज र च्याटभित्र पनि प्रभुको चर्चा र बाइबलको भर्सहरूले आदर र स्थान आउजाउ पायो भने राम्रो हो धेरै, धेरै राम्रो र हानिको उल्टो फाइदा हो ।

“परमप्रभुलाई मानिसको मार्ग मन पर्‍यो भने उहाँले त्यसका पाइला दह्रिला पार्नुहुन्छ । भजन ३७:२३ ।”

यो लेखका लेखकको सुरक्षाको लागि र यो लेख पढ्नुहुने हाम्रा मित्रहरूका सुरक्षाको लागि प्रार्थना गरिदिनुहोला । धन्यवाद । विदा ।