आईसीसी विश्वकप क्रिकेट लिग २ : नेपालले पहिलो खेल नामिबियासँग खेल्ने

२०८० माघ २३ गते मंगलबार

नेपाल क्रिकेट संघ (क्यान)ले मंगलबार खेल तालिका सार्वजनिक गरे अनुसार आईसीसी एक दिवसीय विश्वकप क्रिकेट लिग-२ अन्तर्गत नेपाल, नामिबिया र नेदरल्यान्ड्स सम्मिलित त्रिकोणत्मक श्रृंखलाको खेल फागुन ३ गते देखि हुने भएको छ ।

सार्वजनिक खेल तालिकाअनुसार नेपालले पहिलो खेल नामिबियासँग खेल्ने छ । यस्तै दोस्रो खेल ५ फागुनमा नेपाल र नेदरल्याण्ड्सबीच हुने छ ।

सबै खेल कीर्तिपुरस्थित त्रिवि क्रिकेट मैदानमा हुने क्यानले जनाएको छ । खेल बिहान ९ः१५ बजे शुरू हुने छ । राउन्ड रोबिनमा हुने प्रतियोगितामा नेपाल, नामिबिया र नेदरल्यान्ड्ससहित आठ टोलीको सहभागिता रहने छ ।

गत वर्ष सम्पन्न लिगका ३६ खेल खेलेको नेपाल ४० अंक जोड्दै तेस्रो भएको थियो । १ अंक कम जोडेको नामिबिया चौथो भएको थियो । नेदरल्यान्ड्स भने सुपर लिगमा पुछारमा रहँदै लिग २ मा घटुवा भएको थियो ।