कोरोना महामारी विरुद्धको युद्धमा धेरै ख्रीष्टियनहरुले आ–आफ्नो क्षेत्रबाट योगदान दिइरहेका छन् । आज म भोका तथा निर्धनहरुलाई खुवाउने जस्तो परमेश्वरलाई सबैभन्दा मनपर्ने काम गरिरहेका एक जना व्यक्तिको बारेमा प्रकाश पार्नेछु । (कोरोना कालमा विभिन्न प्रकारले मानिसहरुलाई सेवा गरिरहेका अरु व्यक्तिहरु वा संस्थाहरु बारे पछि प्रकाश पार्दै जानेछु —लेखक)
कोरोना भाइरसले मानिसहरुको शरीरमा आक्रमण गरिरहेको छ, साथै संसारका सबै देशहरुको अर्थतन्त्रमा पनि हमला गरिरहेको छ । कोरोना महामारी सँगै विश्वमा भोकमरीको महामारी पनि सुरु भईसकेको विश्व स्वास्थ्य संगठन (WHO) का एकजना उच्चपदस्थ अधिकारीले चेतावनी दिएका छन् । संसारका सबैजसो देशहरु लकडाउनमा छन् । आर्थिक गतिविधि शुन्य जस्तै छ । धेरै मानिसहरुको रोजगार गुमेको छ । मानिसहरुलाई खानको लागि नै समस्या भइसकेको छ । मानिसहरु धेरै निराश भएका छन् । यस्तो अवस्थामा यदि भोकमरीबाट मानिसहरुलाई बचाउने हो भने समाजका सबै क्षेत्रका मानिसहरु अगाडि आउनु पर्दछ ।
कोरोनाको कहरपछि नेपालमा आत्महत्या गर्ने मानिसहरुको संख्या पन्ध्रसय भन्दा बढी भैसकेको छ । तर यस कोरोना महामारीको बीचमा पनि केही मानिसहरुले अत्यन्त राम्रो काम गरिरहेका छन् । आज म तीमध्ये एकजना तुलसी श्रेष्ठको बारेमा बताउँदछु ।
तुलसी श्रेष्ठ र उनको टिमका मानिसहरु यस कोरोना कालको लकडाउन अवधिभर गरिब तथा निर्धनहरुलाई निःशुल्क खाना खुवाउन सक्रिय भइरहेको छन् । बौद्ध जोरपाटीका तुलसी श्रेष्ठ मूलत ब्यापारी हुन् । तर लकडाउनले गर्दा उनले व्यापार व्यवसायबाट केही समय बिश्राम लिनु पर्ने भयो । यस्तो बेलामा के गर्दा असल होला र खाँचोमा परेका मानिसहरुको सेवा गर्न सकिएला भनी तुलसी श्रेष्ठले सोच्न थाले । आफ्नो वरपर असंख्य निर्धन तथा भोका पेटहरु रहेको महशुस गरेपछि तुलसी श्रेष्ठ सामुदायिक भान्साघर (किचेन) संचालन गर्ने निर्णयमा पुग्छन् । त्यसको लागि उनले एउटा समूह (टिम) बनाउँदछन् । टिममा उनले आफु जस्तै समाजसेवाको भावना भएका मानिसहरुलाई समावेश गर्दछन् ।
कोरोना भाइरससँगको विश्वयुद्ध संसारका सबै देशहरुले लडिरहेका छन् । पहिलो र दोस्रो विश्वयुद्ध सम्बन्धित देशका सिपाहीहरुले लडे तर यो कोरोना महामारीका विरुद्धको विश्व युद्धमा डाक्टरहरु, नर्सहरु, पारामेडिकल स्टाफहरु, संचारकर्मीहरु, सफाईकर्मीहरु, सुरक्षाकर्मी तथा समाजसेवीहरुले लडिरहेका छन्। यो युद्ध अरु युद्ध भन्दा फरक तर बढी खतरनाक छ किनभने यो युद्ध आँखाले नदेखिने भाइरसको विरुद्धमा लड्नुपर्छ ।
तुलसी श्रेष्ठ त्यस्तै एकजना समाजसेवी कोरोना विरुद्धका फाइटर हुन् । तुलसी श्रेष्ठले समाजका विपन्न तथा गरिब वर्गहरुलाई निःशुल्क खाना खुवाएर उनीहरुको रोग प्रतिरोधी क्षमतामा बृद्धि गरेर कोरोना महामारी विरुद्धको लडाई लडिरहेका छन् । लकडाउनको अवधिभर तुलसी श्रेष्ठ र उनको टिमले बौद्ध जोरपाटी क्षेत्रमा हजारौं भोका पेटहरुलाई खाना खुवाउने काम गरेका छन् । तुलसीको टिमले हरेक दिन ५०० जनालाई दैनिक बिहान बेलुका खाना तयार गर्दछ । तुलसीले संचालन गरेको सामुदायिक किचेनमा नियमित खाना खान आउने श्याम कुमारले आफुूले सधै तुलसी र उनको टिमका सबैलाई मुरी मुरी धन्यवाद दिने गरेको बताए । उनी थप्छन्र्, तुलसीको टिमले नखुवाएको भए सायद कोराना कालमा म भोकभोकै भौतारिनु पथ्र्याे ।’
तुलसी र उनको टिमका मानिसहरु बिहान सबेरै उठछन् र थोक बिक्रेताहरुबाट दाल, चामल र तरकारीहरु किनेर ल्याउँछन् अनि आ–आफ्नो कामको बिभाजन गर्छन् । कसैले खाना पकाउँछन्, कसैले भाडा माँझ्छन्, कसैले तरकारी काट्छन् । भान्साका खाना तयार भएपछि निर्धन तथा भोको पेट भएका मानिसहरु खाना खान लामबद्ध हुन आउँछन् । उनीहरुले खाना मात्र वितरण गर्दैनन्, तर खाना खान आउने मानिसहरुलाई सामाजिक दुरीको बारेमा जागरुक पनि गराउँछन् ।
आफ्नो भान्सामा आउनेहरुका साथै उनीहरु उपत्यकाका अस्पतालहरुमा पनि खाना वितरण गर्छन् । बीर अस्पताल, टिचिङ्ग अस्पताल, कान्ति अस्पताल तथा ट्रमा सेन्टरमा उनीहरु आफैले बनाएको खाना लिएर पुग्छन् । ती अस्पतालहरुमा उनीहरु बिहान र बेलुका नै खाना बोकेर जाने गरेका छन् । उनको टिमका मानिसहरु खाना बाँड्न विभिन्न अस्पतालहरुमा पुग्दा एकजनाले सामाजिक दुरी कायम छ कि छैन भनेर नियालिरहेको हुन्छ । तुलसी श्रेष्ठलाई यस काममा देश विदेशमा रहेका धेरै साथीहरुले सहयोग गरिरहेका छन् । सक्नेले आर्थिक सहायता गरिरहेका छन् । आर्थिक सहायता गर्ननसक्नेले प्रार्थनाद्वारा सहयोग गरिरहेका छन् ।
लकडाउन अवधिभर कोही पनि नेपालीले भोकै बस्न नपरोस् भन्ने चाहना राखेर तुलसीले निःशुल्क खाना खुवाउने आफ्नो सामुदायिक किचेन भएको स्थानको नक्सा बनाएर धेरै मानिसलाई वितरण गरे । विपत्तिका बेला कोही पनि भोकै बस्न नपरोस् भन्ने चाहना तुलसी श्रेष्ठ र उनको टिमको रहेको छ ।
हामीले तुलसी श्रेष्ठले जस्तै आफ्ना छरछिमेकीमा रहेका बिपन्न, गरिब तथा रोजगार गुमाएकाहरुलाई सहयोग गरौ । कोहीपनि नेपाली भोकोपेट सुत्न नपरोस् ।
Discussion about this post