अल्पसंख्यक नेपाली ख्रीष्टियन समुदायलाई नियोजित रूपमा बद्नाम गराउन खोज्नु दुःखद् भएकोः संघीय सांसद माननीय अतहर कमाल मुसलमान

[ 0 ] June 4, 2019 |

२१ जेठ, २०७६, ललितपुर । नेपाली कांग्रेसका नेता तथा संघीय सांसद माननीय अतहर कमाल मुसलमानले नेपालको संविधानमा देशलाई धर्म निरपेक्ष भनेतापनि अझै अल्पसंख्यक ख्रीष्टियन धार्मिक समुदायलाई सरकारले हेर्ने दृष्टिकोण फरक भएको बताएका छन् ।
सोमबार सञ्चार पैरवी मञ्च नेपालको आयोजना तथा भक्तपुरस्थित  रुपान्तर नेपालको सहयोगमा आयोजित धार्मिक स्वतन्त्रता र ख्रीष्टियन मिडिया विषयक एक दिने कार्यशालामा उनले ख्रीष्टियन समुदायले यो देशमा शिक्षा, स्वास्थ्य र विकास निमार्णमा पु-याएको योगदानलाई सरकारले कदर गर्नुको साटो सोझा नेपाली ख्रीष्टियन समुदायलाई नियोजित रूपमा अनावश्यक दुःख दिँदै धर्म परिवर्तनको झुठा मुद्धा बनाई अल्पसंख्यक धार्मिक समुदायविचको आपसी सद्भावलाई विथोल्न सरकार आफै लागिपरेको आरोप लगाएका छन् ।

प्रदेश १ की प्रदेश सांसद उमिता विश्वकर्माले पत्रकारहरूले कोही कसैसँग पूर्वाग्रही नराखी निष्पक्ष भई सत्यको उजागर गरी पीडितलाई न्याय दिलाउनको लागि आफनो कलम चलाउनु पर्ने बताएकी छिन् । उनले पितपत्रकारिता देशमा मौलाउँदैँ आएकोले बाइबलीय सिद्धान्तमा आधारित ख्रीष्टियन मिडियाले राष्ट्रमा एउटा असल सन्देश प्रवाह गरी अब आफनो समुदायको आवाजलाई समेत उजागर गर्नुपर्ने बेला आएको बताएकी छिन् ।
नेपाल ख्रीष्टियन समाजका महासचिव डिल्लीराम पौडेलले नेपालको ख्रीष्टियन समुदायले आफनो धर्मको स्वतन्त्र अभ्यास र अवलम्बन गर्न नपाएको गुनासो गरेका छन् । उनले ख्रीष्टियन समुदायलाई दिनप्रतिदिन धर्मपरिवर्तनको नाउँमा अपराधी झै पक्राउ गर्नुले नेपाली ख्रीष्टियन समुदायले असुरक्षित महशुस गरेको समेत बताएका छन् ।
एकदिने कार्यशालाका प्रमुख प्रशिक्षक स्वतन्त्र लेखक तथा धार्मिक स्वतन्त्रताका अभियन्ता वि.पी. खनाल र रिलिजियस लिबर्टी फोरम नेपालका अध्यक्ष टंक सुवेदीले धार्मिक समुदायको मर्म विपरित नेपालको संविधानमा लिखित धर्मनिरपेक्षको गलत व्याख्या गरेकोले तत्काल संसोधन र्गुपर्ने माग गरेका छन् । कार्यशालामा मानवअधिकारकर्मी, पत्रकार, स्वतन्त्र लेखक, विद्यार्थी, समाजसेवी तथा समाजिक अभियान्ताहरू र विभिन्न क्षेत्रका प्रतिनिधिहरूको उल्लेखिय सहभागिता रहेको थियो ।

Facebook Comments

Category: News & Events